Vawiin khan Chhimveng YMA Hall, Mamit-ah Fostering Climate Resilient Upland Farming System (FOCUS) hnuaia Community Animal Health Worker (CAHW's)-te tan Orientation Training buatsaih a ni a. Pu Jacob Lalawmpuia, Addl. DC, Mamit chuan he hun hi a hmanpui.

Pu Jacob Lalawmpuia chuan Community Animal Health Worker hna chu hna pawimawh tak a nih thu sawiin khawtina a taka hnathawktu tur an nih avangin thahnemngai taka hnathawktu ni theuh turin a chah a. Mizote chu kan pi leh pute atanga ran vulh hnam kan ni a, kan ran ngainatna thinlung chu kan ram Economy tidanglam thei tura awmze nei zawka kan kaltir a ngai a ni a, chumi tur chuan kan mithiamte bakah tuna CAHW's-te chu nasa takin an pawimawh dawn a ni a ti. Kan ram thanmawhbawk chu kan tih tur kan tih tawk loh vang leh kan thahnemngaih tawk loh vang a nih thu sawiin mi pakhat titha duhin danglamna nasa tak a siam thei a, chutiang bawkin mi pakhat titha duh pawhin danglamna nasa tak a siam thei bawk a. Danglamna thlentu rau rauah a tha zawnga danglamna thlentu nih tum theuh tur leh thahnemngai taka thawktu ni turin kalkhawmte a chah.

Dr. Lalhmingthanga, Deputy Director, Focus, Project Management Unit chuan Focus Project chungchang sawifiahin Focus chu IFAD duhdan angin Politics inrawlh lova Society anga kalpui a nih thu leh Chief Secretary hnuaiah Sorkar Society anga a awm mek thu a sawi a. He Project-in a tum ber chu sik leh sa lo danglam karah pawh hmantlak tur Farming System duanchhuah bakah a hralhna tur thlenga buaipui a nih thu a tarlang.

Pi Vanlalruati, Manager, Gender & Community Institution chuan CAHW-te tih tur leh mawhphurhna hrang hrang hrilhhriatna neiin Dr. Lalawmpuia, T.O, Vety PMU chuan an hriatfiah lohte zawhna leh chhanna hun a hmang bawk.

Vawiin Orientation Training hi Dr. Lalmakzuala, DVO, Mamit chuan kaihruaiin Mamit District chhung khaw 74 atangin Community Animal Health Worker tura ruat mi 53 an tel a ni.