Nimin khan Pu Robert Romawia Royte Minister Tourism, Sport & Youth Services, Information & Technology chuan Zawlnuam khua-ah Tourist Lodge, Sport Complex leh Zawlnuam College Hall-te khuallian niin a hawng a. Kanhmun Tourist Lodge hmunhma a tlawh nghal a, Tukin khan Mamit-ah Multipurpose Indoor Stadium Lungphum a phum bawk. He hun hi Er H. Lalzirliana 3-Mamit Bialtu MLA leh Pu Zothantluanga, Aizawl West I, Bialtu MLA te chuan khualzahawm niin an telpui bawk.

Zawlnuam Tourist Lodge sak nan hian Rs 151.87 lakh hman niin Tourist Destination Kanhmun Project hnuaia component pakhat a ni a. Zawlnuam Tourist Lodge sak nan hian 1st Instalment hi Dt 28.3.2008 ah released niin hnathawh tan a ni. Ni 7th June, 2012 ah Tourism Department hnenah Completion Report nena hlanchhawn leh a ni a, Zawlnuam Tourist Lodge hi RCC chhawng hniha sak niin AC room 2, Non Air Conditioned (AC) room panga (5) leh Dormitory khum 5 awmna, room khat(1) avaiin Room 8 luah theih tura ruahman a ni a, AC  room luahman hi zankhatah Rs 1500, Non AC Rs 500 leh Dormitory khumkhat luahman hi Rs 100 a ni dawn a, Room book duhdan Ph 8415842900 ah biak theih niin. A sak hna hi Mizoram PWD (Building) te chuan an kutken a ni.

Nimin veka hawn tak Zawlnuam Sport Complex hi Sport Infrastructure Development of Hachhek Area atangin Rs 489.86 lakhs hmuh niin Nextcom Consultancy Luangmual te'n an thawk a. Zawlnuam Sport Complex hian Pavillion for Football Ground, Viewing Gallery  Under drain, Basketball Court, Volleyball Court, Retaining Wall, Boundary Fending leh Approach Road te a keng tel a ni. Zawlnuam College Hall hi a dung 64ft leh avang 26 ft niin RUSA hnuaiah Rs 70 lakhs hmuh atangin sak a ni a, Multipurpose Hall bakah hian Classroom Building sak tel a ni bawk.

Pu Robert Romawia chuan khawvel ram changkangte hmasawnna chu khawthlang lam atangin a in tan thin a, keini khawthlang lam pawhin kan ram leilung hausakna leh ram hmel hmangte hmang tangkaiin hmasawnna hna thawh a ni dawn a. Kan thenawm Tripura State-in Tourist mikhual an neih thin te'n Mizoram tlawh lova an let leh mai thin chu thlakin Khawthlang lamah hian Tourist mite hip thei tura hmalak tum a ni a ti, chuvangin Tourist Lodge te pawh thuam that chhoh mek zel a ni a. Zawlnuam Tourist Lodge hawn tak chu khualzin mite tana hahchawlhna hmun nuam tak tur niin, Tourist Circuit a awm ve theihnan leh Tour pakage ah Tourist mite an telh ve theihnan hmalak zui tum anih thu a sawi. Khawthlang tlangvalte chu ruitheih thil leh zu laka fihlim turin Sport(Infiamna) hmanga hmalak a ni dawn a, Thalaite nun a tha zawnga kaihhruai turin an nuam tih zawng ber Sport hmanga hmalakna tur hmunhma kan neih te chu chhawr tangkai thiam turin kalkhawmte a chah a ni.

Pu Roberta chuan khawthlang ram chu thenawm State te nena inthenawm mai an nih avangin zu leh ruihhlo tawlhrukna remchang mai   atana hmang lovin ram leilung hausakna haichhuak thiama, hmalam hun atana mite hnunga kal mai tura in ngai lo-in ram leh khawtlang tana chhenfakawm ni tura hmalam pan tum sauh sauh turin a fuih bawk.

Er. H. Lalzirliana, Bialtu MLA 3-Mamit pawhin thusawiin khawthlang tlangvalte ram rorelna khawlah dinhmun pawimawh takin kan awm chho ve ta chu thlamuan thlak a tih thusawiin kan hmalam hunah tumna tak tak nena hmalam kan pan chuan theihloh a awmlo a ni tih hre chunga ram leh khawtlang tana lungrual taka thawhho puiah a sawm bawk a ni.

Khualzahawm nia he hun hmanpuitu Pu Zothantluanga MLA Aizawl West I chuan khawthlang mi anih angin hmasawnna hnathawh kawngah ram leilung hausakna hrechiang tute zingah a tel thu a sawi a. Zawlnuam Balu chu Mizoramah a tluk awmlo,  a nih thu sawiin tun aia nasa zawka haichhuah anih theihna tura hmalak a nih dawn thu a sawi bawk.

Nimina, Zawlnuam khua-a Sawrkar hmasawnna hna hrang hrang hawnna pual inkhawm Zawlnuam Multipurpose Hall-a neih hi Pu H. Lalengmawia, IAS Secretary Sport & Youth Services chuan kaihruaiin, Pu C. Laltlanthanga, Sports Council Secretary leh Pu Saitluanga, Director, Tourism bakah Aizawl leh Mamit atangin Officials thahnem tak, zirlai naupang, nu leh pa bakah khawtlang hruaitute an tel a ni.

Tukin khan Sport Minister Robert Romawia Royte hian Mamit-ah Multipurpose Indoor Stadium changtlung tak dinna tur lungphum phumin, 1 phase hna tan nan hian 4.5 crore ruahman a ni. Robert Romawia chuan Mizote chu India rama hnam fit ber ni thei turin theihna kan nei a ni tih hria-in Sport Policy  mumal leh State Games pawh neih thuai a ni dawn a ni a ti.

Mamit District chu India rama District chawikan ngai Aspirational District atanga chawikan dawrna turin Sawrkar hmalakna chuan a kalkan dawn loh thusawiin mipuite hriselna kawngah pawh hmalakna kalpui mek  anih thu a sawi a, Luangpawl tlangzawl chu Playground atana tinzawn a ni a, Lengpui Field-ah District chhunga a hmasa ber turin Phullem phah a nih dawn thu a sawi bawk a ni.  

Multipurpose Indoor stadium lungphum phum na-ah hian Er.H. Lalzirliana, 3-Mamit Bialtu MLA, bakah Sport Council lama thawktute, Mamit khawpui chhunga Sawrkar Officials leh khawtlang hruaitute an tel a ni.