Lawngtlai District Level Coordination Committee on Registration of Births & Deaths chu vawiin khan an Chairman, Lawngtlai Bawrhsap, District Registrar ni bawk Pi Shashanka Ala, IAS hovin Lawngtlai DC Conference Hall-ah an thu khawm a. Piang leh thi chhinchhiah kawnga thil pawimawh hrang hrang an sawi ho.

Chairman Pi Shashanka Ala chuan khua leh tui dik takte'n sawrkar atanga hamthatna leh an chanvo dik tak an chan theih nan piang leh thi chhinchhiah chu a pawimawh em em a ni tiin, certificate chu khua leh tui dik takte chauh pek a nih theih nan leh certificate dik tak chauh pek chhuah a nih theih nan thu neitute insan mar a tul hle a ni, a ti a. Birth certificate pek chhuah kawngah khaw tina local registrar-te'n dik lo taka certificate pek chhuah leh sum siam nana hman an chin loh nan uluk taka vil turin District Research Office-a thawkte chu a chah.

Vawiin thut khawmah hian kum 2018 leh 2019 chhunga piang leh thi chhinchhiah dan leh certificate pek chhuah dan tar lan a ni a. Kum 2018 chhung khan local registrar-te kal tlanga piang chhinchhiah (certificate pek chhuah) 2587 leh thi chhinchhiah (certificate pek chhuah) 393 a awm a; DRO office atanga delayed birth certificate pek chhuah 226 leh delayed death certificate pek chhuah 13 a awm a; DRO office atang veka a hmaa chhinchhiah tawh sa birth certificate pek chhuah nawn (re-issue) 500 leh death certificate pek chhuah nawn 10 a awm bawk. Kum 2019 January atanga June (kum chanve) chhungin local registrar atangin piang 1505 leh thi 125 chhinchhiah a ni a; DRO atanga delayed birth certificate pek chhuah 91 leh delayed death certificate pek chhuah 5 a awm a; birth certificate re-issue 311 leh death certificate re-issue 10 a awm bawk.

He thut khawmah hian local registrar-te'n piang leh thi an chhinchhiahna record bu hlui department-a theh luh loh leh kim lo awm chungchang te, certificate pek chhuah nawn dan leh certificate dik lo pek chhuah a nih loh nana hma lak dan tur te, India sawrkarin kum 2020-ah chuan khua leh tui piang leh thi reng reng 100% chhinchhiah ni tura a tih tihlawhtling tura hma lak dan tur te sawi ho a ni a. Mipuiah birth certificate leh death certificate neih pawimawhzia leh certificate lak chhuah nana hriatpuitu lema lo tansak pawi theihzia te inzirtirna neih a nih theih nan hma lak ni se, tih a ni.

Registration of Births & Deaths Act 1969 chuan India khua leh tui zawng zawng chu an pian leh an thih chhinchhiahna a awm ngei ngei tur a ni tiin a phut a. Hei hi 100% a puitlin theih nan sawrkar chuan hma a la mek a ni. Tun dinhmunah Mizoram pumah piang leh thi chhinchhiahtu Registrar of Births & Deaths (RBD) 843 leh Medical Institution Registrar 103 an awm mek a. Lawngtlai District bikah chuan RBD unit 124 leh Medical Institution 7 a awm.

Pian emaw thih emaw atanga ni 21 thleng chu eng mah chawi ngai lovin local RBD-te'n certificate an pe chhuak thei a; ni 22 atanga ni 30 inkarah late fee Rs 10/- leh certificate man Rs 100/- chawiin RBD-te hnen atangin certificate lak theih a ni a; chumi piah lam ni 31 chin chu kum 1 thlengin DRO/Asst District Registrar atangin late fee Rs 100/- leh certificate man Rs 100/- chawiin lak chhuah theih a ni a; kum 1 a pelh tawh chuan late fee Rs 1000/- leh certificate man Rs 1000/- chawiin Judicial Magistrate 1st Class kal tlanga dil a ngai tawh thung.