Vawiin khan Food Civil Suplies & Consumer Affairs Minister Pu John Rotluangliana kaihhruaina in a office chamber-ah Consultative Committee Meeting neih a ni a. He hunah hian Pu K. Sangthuama, MLA; Pu P.C. Zoram Sangliana, MLA; Pu John Siamkunga, MLA; Pu Hrangtawna, Secretary, FCS&CA leh Pu H.L. Rochungnunga, Director, FCS&CA leh member dangte an tel a ni.

Pu John Rotluangliana chuan meeting koh chhan ber Food Security Act Mizorama hman tan anih dan tur a sawifiah a. He FSA hian party leh mimal a thliar dawn lova, Zoram mipui dawng awma ngaihte tan a niin a thlan tur dik takte chu thlan mai tur anih thu Minister chuan a sawi. Sorkar laipui chuan Mizoramah October thla chhunga he dan hi hmang tan tura a tih laiin inpeih hman loh rin anih avangin November thla thleng an pawhsei sak a ni tih a sawi a. Food Security Act hman anih chuan AAY chhungkua atangin mi 7,06,296 te thlanchhuah an nih tur thu leh hemi a thlan loh midangte chuan ration lak dan pangngaiin an lak tur thu a sawi.

Supply Department chuan National Food Security Act hman dan tur kaihhruaina (guideline) Mizoram Food Security Rules, 2015  a duang fel tawh a. Sorkar pawhin pawmpui tawhin Official Gazette ah pawh chhuah a ni tawh. District hrang hrangah hemi thlang tur hian khawtina V/C te leh NGO te leh mi rintlakte ruat an ni. FSA hi hman anih hunah chuan retailer leh kudam-ah te pawh Computerized veka tih tur a niin hemi atan hian thawktu pawh mi engemaw zah lak an ni tawh a. October thla tir lamah training an nei dawn a ni.

He meeting a tel Pu P.C. Zoram Sangliana, MLA; Pu K. Sangthuama, MLA leh Pu John Siamkunga te chuan Supply Minister Pu John Rotluangliana chu a hmalakna ah fakin lawmthu an hrilh a. Retailer Buhfai Rs. 10 a lak thin Rs. 15 a tih san a nihna atangin Mizoram sorkar-ah sum Supply Department chuan a chhunglut hnem a. Ration Card fel lo thenfaina atangin buhfai qtls. 80,000 lei ngai ni thin kha qtls. 40,000 a a tlakhniamna ah te lawmthu an hrilh a ni.