Vawiin hian Lawngtlai DC Conference Hall ah Lawngtlai leh a chhehvel khuate a Food Security Act hnuaia tanpuina dawngtu turte thlan dan inhrilh hriatna hun buatsaih a ni a, Addl DC Pu R. Lalsangluaian a hman pui.

Pu R. Lalsangluaia chuan, sawrkar in miretheite chhawmdawl a tumna kawnga Policy pawimawh ber te zing a mi Food Security Act kalpui danah fimkhur taka thiltih a tul thu sawiin, a dawng thei tur dik tak ten an dawn a, chhanchhuah ngai dik takte chhanchhuaha an awm theih nan Village Council te leh khawtina Food Security Committee te chuan mawhphurhna pawimawh tak an chelh a ni, a ti a. He danin a dawngtu tur thlan dan tur a duante chu chiang taka hria a, dan ang thlapa kal tum turin a chah a ni.

Lawngtlai leh a chhehvel khua 22 ah hian Food Security Act hnuaia man tlawm zawka buhfai dawng thei tur chhungkua 14658 an awm dawn a,an zinga chhungkaw 10091 te hi Urban huam chhunga mi niin a dang chhungkaw 4567 te hi rural huam chin a mite an ni thung. Heng chhungkhua thlan chhuah dan tur atan hian Food Security Act in a phut anga kalpui dan tur sawihona a ni. Heng chhungkaw dawng thei zat atangte hian Priority Household leh AAY Scheme dawngtu turte pawh thliar fel leh a tul dawn a ni.

He training hi Pu Spencer Vanblalchhuanga, DCSO Lawngtlaiin a kaihruaia, Food Security Act kalphung pawimawhte a sawifiah nghal bawk.

He hunah hian khaw 22 a VCP te leh an khaw Food Security Committee Secretary theuhte an tel a ni.