Vawiin khan Mizoram Youth Commission Chairman Office ah Mizoram Youth Commission (MYC) leh M/S Excel India Group, New Delhi chuan Staff Selection Commission (SSC) Coaching Class hawng turin inremna an ziak.

MYC aiawh hian Chairman Pu T.Sangkunga leh M/S Excel India Group aiawh hian an Director Pu Nipun Kohli te chuan hming an ziak a. Chief Minister Pu Lal Thanhawla leh Labour, Employment & Industrial Training (LE&IT) Minister Pu Lalrinmawia Ralte remtihnain agreement hi an ziak a ni. Ruahman dan chuan class hi November thla tawp lamah tan tum niin a course hi SSC 10+2 leh Graduate Level hrang hrang Bank P.O, Assistant, UDC, LDC, DEO, Examiners, Officers of Income Tax, Customs, Excise, CBI, CPO, CRPF, CISF, IB, Sub Inspector, Inspector, Railway leh Central sawrkara clerk level hna dang exam tumte tan a ni a. Heng hna atana advertisement hi Mizoram Youth Commission in a la tichhuak ang a. Coaching Class neihna hmun leh tan hun kimchang chu a hranpa a la puanchhuah a ni ang.