India ram chhung mai nilo, foreign-ah Mizo thalaite'n hna an neih theih nan Mizoram sawrkar chuan hma a la mek zel a. Mizoram Youth Commission chuan Ministry of Overseas Indian Affairs, Govt. of India hnuaia Recruiting Agents hmun hrang hrang a mi be pawpin November ni 11 khan Vira International, Mumbai nen Mizoram Youth Commission Training Hall-ah Workshop neih a ni a. Hemi kal zelah hian Gulf ram hrang hrangah mipa leh hmeichhia hnathawk thei tura hmalak mek a ni.
Tun dinhmunah UAE leh Bahrian-ah Restaurant & Retail Outlet-a Waiter/Waitress hna thawk tur mipa leh hmeichhia, Saudi Arabia-a Nurse hna thawk tur passport nei mipa leh hmeichhia internet kaltlanga Interview Session nei tura ruahman a ni a. Hlawh hi Rs. 20,000 - 50,000 inkar a ni ang. Mipa leh hmeichhia kum 20 aia naupang lovin an dil thei a, hemi bakah Construction Sector-a thawk duh tan pawh remchang siam zel tum a ni. Kumin Krismas hma hian a Batch hmasa ber turin Mizoram Youth Commission-in skype hmangin interview a buatsaih dawn a. Passport nei Mizo thalai hna zawnglai te chuan ngaihven nghal tur a ni. Genting Dream Cruise-ah Light & Sound Technician pakhat; Stage Hands pahnih; Photo Manager pali; 1st leh 2nd Cook pali leh Bar Tender, Assistant Bar Tender, Cellar Master, Bar Manager te mamawh a nih thu Joncia Marine, Margao, Goa atangin dawn a ni a, hemi lam a tuimi te tan Mizoram Youth Commission kaltlangin CV/Resume thawn theih nghal a ni. Front of the House-a (mikhualte nena inhne a hnathawk - steward, butler leh a dangte) thawk turin diltu chu 170 cms aia hniamlo an ni tur a ni.
Foreign-a thawk duh Passport la neilote pawhin an neih vat theih nan Mizoram Youth Commission Office-ah thil tulte ngaihven theih reng a ni.
Mizoram Youth Commission hian SSC Coaching batch thar a la leh dawn a. Batch thar tur hian vawiin khan interview neih niin December ni 9 ah class an tan ang. MYC SSC Coaching batch hmasa zawkte zingah SSC Prelims paltlang mi 55 an awm a ni. MYC hian North East Rural Livelihood Project hnuaiah Aviation-ah thalai 60 training a neihpui mek bawk.
