Primary Health Centre (PHC), Bilkhawthlir chuan Kayakalp 2016 intihsiakna-a Kolasib District a PHC fai lawmman pakhatna an lak lawmna hun vawiin khan an hmang a, Pu K.Lalrinthanga, Parliamentary Secretary leh Bialtu MLA ni bawk chuan a hmanpui.

Pu K.Lalrinthanga chuan Kayakalp 2016 intihsiakna-a Kolasib District a PHC fai lawmman pakhatna Bilkhawthlir PHC in a la chu a lawmpui thu sawiin, khawtlang hruaitute leh NGO te nena an thawhhona chu fakawm a tih thu a sawi a. Medical Officer Quarters leh OPD Building sakna atan ruahmanna siam a nih thu sawiin, a hlawhtlin ngei a beisei thu a sawi a. Bilkhawthlir tana sorkar hmachhawp te tarlangin, tui thianghlim hnianghnar zawk an neih theihna tura hmalakna chu a hmawr bawk anih tawh thu leh hawn mai theiha peihfel a nih tawh thu a tarlang a. Bilkhawthlir-ah Sainik School din tum a nih thu a sawi tel bawk.

He hunah hian Dr.Lalhlimpuia, Chief Medical Officer, Kolasib District chu khualzahawm a ni a. Pu Lalthanzuala, Pharmacist in he hun hi kaihruaiin, C.Lalngaihzuala’n Kayakalp 2016 atana inbuatsaih dan report a pe a ni.

Kayakalp 2016 atan hian PHC hnathawktu te bakah, sorkar department dang te leh NGO hrang hrang te nen tanghovin hmalak a ni a,sum leh pai leh tha leh zung sengin an thawkho a ni. Kayakalp hi Swachh Bharat hnuaia programme pakhat niin, sorkar damdawiin te faina kawnga inelna a ni a. PHC bik hi District chhunga PHC dangte nen inelna neih tir a ni a, Bilkhawthlir PHC hian 91.3% hmuin, Kolasib District a PHC pangate zingah faiber lawmman a dawng ta a ni. Lawmman pakhatna hian pawisa fai Rs.2,00,000/- (nuai hnih) leh thuziak a keng tel a ni.