Ni 30.11.2016 (Nilaini) khan Pu Rosiama Vanchhawng, Additional Principal Chief Conservator of Forests leh Pu Kawlhnuna, Divisional Forest Officer, Darlawn Forest Division- te kaihhruaiin Forest department field staff leh N. Khawlek mipuite chuan N.Khawlek dai a Ngiau (Michelia) thing lian tlu an enfiah a.

He thinglian sample hi Aizawl-a Forest department pisa puia dah turin Aizawlah hemi ni vek hian phurh thlak a ni. He thing lian hi tehkualin 7.62 mts a lian a ni a. A diameter hi a lian laiberah 2.43 mts a ni a, a te laiberah 2.02 mts a ni. He Ngiau lian hnuk chhuak tur hian N.Khawlek YMA member te leh khaw mi thahnem tak an thawk chhuak a. Kawng atanga 450 mts vel kawng thlang lam atangin an hnuk chhuak a ni.

He mi zan hian Community Hall-ah Environmental awareness campaign neih nghal a ni a. N.Khawlek khaw mipui tam tak kal khawmin campaign hlawhtling tak neih a ni.

He Ngiau thing lian hi kihthluk emaw a ni lo a. N. Khawlek YMA Branch ten uluk taka an enkawl leh humhalh thin a ni.

Kum 2008 fur lai khan leimin nasa takin he Ngiau lian hi a nawr thlu a. Environment, Forest & Climate Change Department atang pawhin hemi kum hian enfiah nghal a ni a. Mahse lakchhuah nghal mai theih a nih loh avangin kum 7 hnuah he thinglian sample hi lakchhuah a ni ta a ni. Kum 1996 khan Zawlte ram, Bukpui Village Council huamchhungah India ram puma Ngiau thing lian ber hmuh lo ni tawh a.

He thinglian hi tehkualin 6.52 metre a ni a, hemi avang hian India Sawrkar laipui chuan Bukpui Village Council hnenah lawmman, Rs 50,000 leh citation a lo pe tawh a ni. He thinglian record tawh aia lian zawk N.Khawlek rama hmuh a ni hi department chuan lawmawm a ti a a sample pawh department office a dah turin a la ta a ni. EF&CC Department chuan a upat zawng pawh enfiah an tum dawn bawk a ni.