Vawiin khan Mamit SP hovin a Office Chamber-ah Mamit District Police Crime Review Meeting neih a ni.

He meeting-ah hian kumin chhunga Crime records leh Case Register te zirhovin nikum lam nena khaikhinna an nei a, Kum 2015 January - November a Mamit District a Case Register zawng zawng zat chu 130 a ni a, Kum 2016 January- November ah 145 anih thu leh nikum aiin Crime 15-a a pun thu an sawi a. Mamit District chhunga Sualna/Crime langsar zual deuh deuhte chu Burglary (Mi ina luh ruk,thil ruk), Theft (Rukruk tenau deuh), Naupang khuaikhem/ Hmeichhe zahawmna tih bawrhban (POCSO case) bakah MLPC Act-te an nih thu an sawi.

He meeting-ah hian kumin Krismas leh Kumthar lo thleng tura venhimna chungchang te, NGO/YMA te nena Drugs, Ruihhlo dona kalpui dan te, khaw hrang hranga VDP din chungchang leh an hnathawh enpui dan tur bakah Bru Repatriation lo awm tur atana venhimna security arrangement leh tul dang hrang hrang an sawiho bawk.

District Police te chuan mipuite chu mahni bungrua, in leh lo leh Dawr venhimna chungchangah tun aia fimkhur zawk turin an chah a. Sorkar Office leh bungrua-te himna chungchangah pawh Department hotute'n hma lak theuh nise, Office hotu leh sumdawngte'n CCTV te vuaha hmalak theih nise tih chu an inngenna leh duhthusam anih thu an sawi bawk.

He Meeting-ah hian Mamit SP Pu Abhishek Dhania IPS, Addl.SP, SDPO, PI bakah Police Station OC te an tel a ni.