Vawiin khan Rural Development Minister Pu R.Lalzirliana chuan North East Rural Livelihood Project (NERLP) Aizawl District huamchhunga hmalakna cheng nuai 202.34 chu Chanmari YMA Hall-ah a sem.
Pu R.Lalzirliana chuan mi retheite dawmkanna tura sawrkar hmalakna NERLP kaltlangin sum tam tak sen a ni tawh a, hlawhtlinna pawh thui tak hmuh tur a awm, a ti. Mi retheiten leirem an rah theihna tura sawrkar hmalakna scheme leh project-te za ah za hlawhtling a awm ngai lova, za ah sawmthum tal pawh hlawhtlinna hmuh tur a awm chuan scheme hlawhtlingah ngaih a ni thin, a ti a. Mizoram sawrkar hmalakna NLUP pawh trade thenkhatah 75% lai a hlawhtlin laiin thenkhatah erawh 24% chauh hlawh tling a awm a, a hlawma lak chuan 60% vel zetin NLUP an hlawhtlin pui dawn niin a lang, RD Minister chuan a ti. Pu R.Lalzirliana chuan sawrkar atanga dawn ringawt inbeisei avanga BPL nih chakna thinlung kan paih telh telh tawh a, state dang BPL ho nena khaikhin chuan Mizorama kan dinhmun chu nasa takin a tha zawk a ni, a ti a.
NERLP hian eizawnna neilote tan eizawnna ngelnghet siamsak a tum a, mipui duh dan dah pawimawhin mimal hnenah a thlawnin sum a sem lo va, pawl dinsakin training tha tak a pek hnuah tanpuina sum hi pawl hnenah a hlan thin a ni, a ti. Bul tanna atana sum neih tlem emaw thiamna neihloh emaw chu chhuanlam a tling tak tak lo tiin RD Minister chuan hlawhtlin nan mimal theuh an pawimawh ber a, tanpuina an dawn te ngaihlu a, dik taka sum hmang tur leh malsawmna dawng tlaka an hmaa thil awmte hmachhawn ngam turin kalkhawmte a fuih a ni.
Mizoram State Rural Livelihood Mission (MzSRLM) Mission Director Pi K.Lalrinzuali pawhin thu sawiin NERLP kaltlanga mipui mimir chawikanna tur sum tam tak sem chhuah a ni leh hlawhtlinna thui tak an hmu tawh chu lawmawm a ti a. Pawisa an dawn ang ang, a tam emaw a tlem emaw, a nihna tur dik takah hmang se tiin sawrkarin thingtlang tihhmasawnna tur ruahmanna a kalpui mekte chhawr tangkai tak taktu nih tum theuh turin a sawm a ni.
Ministry of DoNER, Govt. of India in Society NELPS dinin, World Bank sum hmangin kum 2012 atang khan NERLP hmarchhak state pali - Mizoram, Sikkim, Nagaland leh Tripura ah a kalpui tan a. Mizoramah chuan kum 2014 atang khan hnathawk tanin Aizawl leh Lunglei District ah te kalpui mek a ni. NERLP hian thingtlang mite ei leh bar zawnna kawng kawhhmuh nan hlawm thumin hna a thawk a. Thalai hna nei lote training pe in hnathawhna tur ngaihtuah sak emaw anmahnia sumdawnna bul an tan theih nan loan te a ngaihtuahsak a, Self Help Group dinin pawl angin chhungkaw hrang hrang thawkho te tan group kaltlangin tanpuina a pek a, Community Developmen Plan siamin a khaw mipui 60% talin an chhawr theih tur hmalakna a duang a, tanpuina sum a pe bawk thin a ni.
Vawiin a NERLP Fund Release zat hi Federation setup cost atan cheng nuai 6.5, Community Investment Fund atan cheng nuai 75.2 leh Community Development Plan atan cheng nuai 194.17 a ni a. Federation Set up Cost hi Village Federation 13- Tuirial, Sialsuk, Rulchawm, N.Lungpher, Aibawk, Keifang, Suangpuilawn, Tlungvel, Sihfa, Seling, Phuaibuang, Phullen leh Khawruhlian hnenah cheng 50,000 theuhin sem a ni a. An khua SHG te hnena sem chhuah leh turin Darlawn, Tlangnuam, Aibawk, Phullen leh Thingsulthliah Block Project Coordinator te hnenah Community Investment Fund pek a ni a. Community Development Plan hnuaiah khaw hrang hrang 27 te tihhmasawnna tur sum sem a ni bawk.
NERLP hnuaiah hian tun dinhmunah Self Help Group 1604 din a ni tawh a. Hetah hian chhungkua 19,626 telin chhungkaw harsa zual (poorest of the poor) chhungkaw 3925 an tel bawk. SHG te hnena pawisa pek tawh zawng zawng chu cheng nuai 1533.35 a ni. Aizawl District huamchhunga NERLP hmalakna hrang hrang a sum sem chhuah tawh belhkhawm hi cheng vaibelchhe 23 zet a tling tawh a ni.
