Vawiin khan Mizoram Forest Department,Chhimtuipui Wildlife Division chuan sarep leh Sava thang an man te an hal ral.

Deputy Conservation Of Forest, Chhimtuipui Wildlife Division chuan Wildlife Protection Act 1972 bawhchhia a, sanghal sarep leh Sava thang an man te halralna hun vawiin khan a nei a, he huna inkhawmna tawi buatsaih Pu N.R.Pradhan, DCF, Wildlife Lawngtlai kaihhruaiah, Pu Lalchhana Beat Officer,Lawngtlai Town chuan Report pe in, Forest Department ten Wildlife Protection Act 1972 bawhchhiaa phal loh thil tiluia che te man tum a hma an lak dan sawiin,tuna an halral tur sanghal sarep hi Khawmawi khaw nu pahnih ten zawrh atan Sumo a an phur chhuah an man anih thu a sawi. Sa thang leh Sava thang te pawh hi Ngengpui Sanctuary chhehvel khua Khawmawi leh Hmunnuam bulhnai Forest Reserved chhunga an kam lai an mante anih thu a tarlang bawk.

He hunah hian Pu K.R.Pradhan pawhin thusawiin, Mizoramah Forest venhimna lam hawia inzirtirna tam tawk lova a hriat thu sawiin Zirlai naupangte tan pawh Nature Camping leh Nature Trekking te buatsaih theih nise, he lam hawia hma la thei School an awm anih chuan Forest Department pawh an in hawn reng thu a sawi. Mi thahnemngai ten an Silaite tunga, nungchate humhalh kawnga hma an lak mek lai a, lo tihlum a, sumdawn nana lo hmang an awm thin chu pawi atih thu leh kan vela nungcha leh ramngawte humhalh hi mihringte mawhphurhna liau liau a ni tih hria a,he lama thang harh zel tura Zoram mipuite a ngen a ni.

Vawiina Forest Department in Sarep an halral,sanghal sarep hi Fun 18 a ni a, Sava thang Beai,Sathang leh Vahui len engemawzat a tel bawk.