Nimin khan NEEPCO chuan Turial Hydel Electricity Project chheh velah awm khaw pathum – Saiphai, Saipum leh Mauchar te inhmantawm atan Saipum Primary Health Sub-Centre (PHC) hnenah Ambulance thar an hlan. NEEPCO chuan he Ambulance, TATA Sumo motor thar hi Company tena khawtlang rawngbawlna mawhphurhna an neih Corporate Social Responsibility kaltlangin an pe a ni.

Ambulance Inhlanna programme Saipum PHC a neih ah hian Kolasib DC Pu Jitender Yadav, Pu R. B. Sharma, Head of Project, Tuiral HEP, Medical Officer, Bilkhawthlir, Saipum, Saiphai leh Mauchar VC leh an thawhpui thahnem tak bakah NEEPCO officer engemawzat an tel a ni.

Pu Jitender Yadav chuan NEEPCO in heng khaw pathum te hman tura Ambulance an pe chu lawmawm tiin hriselna kawngah hei hian khaw mipuite thui tak a puih ngei a beisei thu a sawi a, duat taka Ambulance hi enkawl a, tangkai taka damlo tana hmang turin heng khaw mipuite hi a chah bawk a ni.

NEEPCO aiawha Ambulance hlantu Pu R.B. Sharma chuan Tuirial HEP huam chhunga khaw awmte mamawh hrang hrang, zirna lamah te, hriselna kawngah te, inkalpawhna leh khawtlang dinhmun chawikan kawngah te hma an lak thin thu a sawi.

He Ambulance hman leh enkawl tur hian heng khaw pathum VCP te telna Committee din a, chu Committee chuan a mamawh te an hmantir dawn a ni.