2358/2024-2025

Aizawl 3rd October, 2024 : Vawiin chawhma dar 11 khan I&PR Conference Hall, Lianchhiari Run, Aizawl-ah Pu Lalthansanga, Environmental, Forests & Climate Change Minister hovin 70th National Wildlife Week, 2024 hawnna neih a ni. 

Khuallian chuan Mizoram-a thil awm reng reng hi hmangaih tura chahin kan sakhua Kristianna nen pawh a inzawm tlat avangin kan ramngaw leh nungchate kan humhalh sauh sauh a pawimawh a ni a. An tel lo chuan kan damkhawchhuak thei dawn lo a ni tih hre tlang ang u a ti. Kan thupui nungchate nena chenho chu tih chu a pawimawh em em a. Min mamawhna aiin kan mamawhna a sang zawk a, an tel lo chuan thing leh hnim to tam tak hian awmzia a nei lo a ni tih hriain kan ram leilung that leh that loh thlengin a nghawng a ni a ti. Kan thlaite ei chhe thin mahse an tel lo chuan kan thlaite hi a tha theih tak tak chuang lo a, dan palzutna avanga nungchate'n an tuar thin chu pawi tiin danin a phal bak sumdawnna kalpui thin chu kan hnualsuat a, kan sim a ngai takzet a, dan palzutna do tur hian department chauh nilovin kan tlawmngai pawlte nen kan tan ho a ngai takzet bawk a ni a ti. 

Forest Minister chuan ramsa pel chingte chuan sim a, an awm ang anga awmtir mai chu ramsa humhalhna tha ber anih thu sawiin an chenna ramngaw tichereu lo tur leh ei leh bar kan zawnna kawngah pawh nungchate chunga zahngaihna lantir tura chahin kan nungchate chenna kan humhalh chuan kan chenna ram a nawm zawk dawn bakah kan eizawnna kawngah pawh min puih dawn thu a sawi a. A Week chhung chauh ni lova kumtluana ramngaw leh nungchate humhalhna kawnga tan la thar turin a sawm bawk a ni. 

He hunah hian Pu Ashok Kumar Biswal, IFS, PCCF chuan keynote address pein thangtharte'n Mizoram ram nuam tak leh ramngaw leh nungchate tamna inthlahtute atanga inrochun chu lawm tak chunga enkawl chhunzawm zel tura chahin chhuan lo la awm zel te tan rochun tlak hnutchhiah turin a chah a. Mizoram chu India ramah ramngaw (forest cover percentage) a ram zau zawng atanga teha a sang ber dinhmun 84% lai a ni chu lawmawm tiin chhawmnung zel turin a fuih bawk. Pu Agni Mitra, IFS, Field Director, Dampa Tiger Reserve chuan Wildlife of Mizoram, Values, Conservation Issues & Way Forward tih thupui hmangin a lem nena entirin kalkhawmte zirtirna a pe a. Tun dinhmunah Mizoram-ah Protected area 11 neiin Sahel ei chi (Carnivores) 10 kan neih mek thu a sawi. 

Kumin National Wildlife Week thupui hi "Wildlife conservation through Co-existence" (Inngeih taka khawsa tlang chunga nungcha humhalh) tih niin Wildlife Week hian October Ni 8 thleng a awh ang. 

Minister hian National Wildlife Week puala buatsaih Slogan, Photography leh Painting competition lawmman a sem nghal a. Slogan Writing Competition 

Primary Section-ah 

1. Vivienne Dinsangi, Noah's Foundation School, Chaltlang

2. R. Biakhlupuii, L.R.D New Life School

3. Lalremtluangi, St. Mary's School

Middle Section-ah

1. Lalduhzuala Varte, Noah's Foundation School, Chaltlang

2. Carolyn Lalruatfeli, Presbyterian English School, Tuidam 

3. Lalngaihawma, Rohmingthangi Memorial School, (Rajiv Nagar), Synod Home Mission North

Photography Competition-ah  

1. John Lalhruaitluanga, Champhai Vengthlang

2. Thanliana Hauhhnar, Zonuam, Aizawl 

3. Zarzoliana, Dinthar, Aizawl

Painting Competition-ah 

1. H. Malsawmdawngzuala, St. Paul's Higher Secondary School

2. Lalhmangaihdawngi, Govt. Mizo Higher Secondary School

3. Lalnuntluanga Ralte, St. Paul's Higher Secondary School te'n an dawng a ni.

Painting leh Photography a lawmman latute thlalak leh lemziak hi vawiin vek khan I&PR Art Gallery-ah phochhuah nghal a ni. 

He hun hi Pu H. Lalengmawia, IAS, Commissioner & Secretary, EF&CC chuan kaihruaiin kalkhawmte lawmna thu a sawi a. Pi Margaret Lalramchhani, IFS, DCF (WL) Aizawl chuan lawmthu a sawi a. Ramngaw leh nungcha humhalhtu pawl hrang hrang te, Forest Official te bakah sawmbikte he hunah hian an tel a ni.