Mizorama-a rorelna In hrang hranga member lo ni tawh inzawmkhawm pawl Former Legislators Association of Mizoram (FLAM) chuan October 25 (Pathianni) khan kum 15 a tling ta a. Hemi puala inkhawm chu vawiin nileng khan I & PR Auditorium-ah neiin Mizoram Chief Minister Pu Lal Thanhawla leh Health Minister Pu Lalrinliana Sailo ten khuallian chanchangin an hmanpui a ni.

 

 

Chawhma hun chu FLAM President Pu K.L. Rochama kaihhruaia hun hman niin Mizoram Chief Minister chuan thuchah a sawi a. Pu Lal Thanhawla chuan politics hmanga ram rawngbawltute hian chawlh hun (retirement) an neih ve ngai loh avangin an upa hnu thleng pawh hian thangtharte tana kaihruaitu leh kawng kawhhmuhtu tha tak an ni reng thin a ti. India ram democracy hnuaiah hian politician te chu sorkar-a thuneitu (bureaucrats) ten rah beh tumin nasa takin an bei reng thin a ni tiin Chief Minister chuan Mizoram-ah pawh hetiang hi kan thil tawn ve mek anih avangin FLAM member te chu pawl bik awm lova kan thawhho tlanna tur pawimawh tak a ni ang a ti a. Mizo tih hian hnam hrang hrang leh tawng hrang hrang huam a neihte hi chhawm nun reng a pawimawh thu a tarlanna ah Pu Lal Thanhawla chuan Mizo hnam hrang hrang phuarkhawmtu chu kan tawng hman uar ber Lusei tawng hi a ni a, amaherawh chu Zo hnahthlak zing ami he Lusei tawng hmang thiam ve lote pawh kan enhrang bik tur a ni lo ang a ti a. Khawvel hriatah pawh Mizo hnam nih zahpui lo te chenna ram hi a zim hret hret em tih chu kan zavaia ngaihtuaha roreltu (legislator) lo ni tawhte tan phei chuan kan ngaihven lehzual a tul a, mahni theuh pawh kan in enchianna tur pawimawh tak a ni fovang a ti a. Chief Minister chuan FLAM member-te tana hamthatna awm thei ang chi medical reimbursement-te, MLA/MDC pension leh sorkar khualbuk hrang hranga pindan hauh sak chungchangah te thil awmdan lo enfiah puia a tul anga hmalak pui a tum thu kalkhawmte a hrilh bawk.

Khualzahawm Health Minister Pu Lalrinliana Sailo chuan FLAM member-te zahawmna leh an hmakhua humhalh kawngah chuan rorelna changtu (rulling party) apiangin an ngaihtuahna hmang se tha a a rin thu a tarlang a.  Rual u te sulhnu chhuia rorelna in a hun hmang ve mek anih sawiin an lak atang hian zir tur leh thurawn tha tak tak tam tak a hre thin a ni a ti a. FLAM chu engtik hunah emaw a telve na ngei tur anih avangin mimal tak pawhin an hmalakna ah a thlawp tlat thin a ti a. Damdawiin hotute pawh FLAM member-te chu zah tak leh duat taka lo enkawl thin turin a chah thu Health Minister hian a sawilang.

Vawiin inkhawmah hian General Body meeting hnuhnung ber leh tun inkara an member chatuan ram pan ta te Pu J. Lalsangzuala, Pu Lalkhawnghinga leh Pu Vanlalngena te sun nan ngawi rengin an ding a. General Secretary leh Treasurer report-te ngaithlain tunlaia damdawia inenkawlna lar tak Ayush chungchang medical department hotuten an hrilhfiah a. Tlai lamah kum 15 tlin lawmna zanriah an kil ho a ni.

2008 MLA inthlan pui ah khan FLAM member 21 in candidate zingah 7 te chu thlan tlin niin an zinga 5 phei chuan tun sorkarah hian dinhmun pawimawh tak tak an chelh hlawm a, member 1 an pawl Treasurer ni thin pawh MP Lok Sabha ah a lut ta bawk.