Vawiin khan Pu Van Hela Pachuau, I.A.S., Chief Secretary, Gov’t. of Mizoram chuan VIII Mizoram Higher Secondary School Games, 2009 chu A.R. Ground-ah a hawng.

Hawnna thu sawiin Pu Van Hela chuan khawvela mi fing hmasa Aristotle leh Plato-te pawh khan Physical Education leh Sports hi zirna peng pakhatah an lo telh daih tawh a. Infiamna leh insawizawina hi taksa hriselna atan thil pawimawh leh tangkai ber pakhat a ni. Tin, chumi piah lamah chuan thian siamna atan a tangkai em em a, inhre ngai lote kan inhriat phah a. Chuvangin, he School Games pawh hi rilru tha leh dik tak pu a, inthian thatna hmanruaah hmang theuh turin School naupang infiam mi zawng zawngte ka chah duh che u a ni, a ti.

Khuallian chuan, Hnam fing leh changkang apiang an rinawm a. keini pawhin rinawmna te, hawihawmna te, taimaknate kan mamawh tak zet a. Thatchhe tan din chhuahna kawng a awm lo a, chuvangin, kan zirlai theuhte thiam tumin taima takin zir ila. Sports pawh eizawnna tham a ni a - eizawnnaa hman tlakin thiam tum bawk ila, mahni zirlai theuh hlawhtlinpui thama zir i tum ang u, a ti bawk.

He School Games Opening Ceremony hi Pu F. Lalhluna, Jt. Director, School Education-in a kaihruai a. Aizawl khaw chhung atangin Higher Secondary School 13 telin Aizawl pawn atangin Higher Secondary school 7 an tel bawk a. an vaiin school 20 atangin zirlai 1172 telin zirtirtu 118-in an buaipui bawk a ni.