24/2024-2025 

Dated Aizawl, the 2nd April, 2024: Governor Dr Hari Babu Kambhampati chuan vawiin khan Foundation day of Rajasthan leh Odisha chu Durbar Hall, Raj Bhavan-ah khuallian niin a hmanpui.

He hunah hian Governor chuan Rajasthan leh Odisha foundation day hman theih a ni chu lawmawm a tih thu a sawi a. Rajasthan chu hmunhma mawi leh ropui tak tak awmna anih thu sawiin, lal khaw ropui tak tak, rawng inchawih mawi tak mai a duan te chu a ropui a tih thu sawiin, geography lamah Aravalli, India khawmualpuia tlang dung upa ber awmna niin, history lamah pawh Kalibangan, hmanlai Indus Valley Civilisation awmna hmun mai bakah kulh ropui tak tak awmna a ni te chuan a state ropuina a tih zual thu a sawi.

Governor chuan Odisha chu ramsa leh ramngaw chi hrang hrang awmna hmun anih avangin fakawm a tih thu a sawi a. Culture ropui tak nei, Temple State of India tih theih hial turin temple 600 chuang nei a ni chu ropui a tih thu a sawiin, Nandan Kanan zoological park, India rama sahuan lian ber dawttu awmna hmun a ni te chu fawkawm a tih thu a sawi bawk a ni.

Governor chuan he programme hi India Sawrkar hmalakna, ’Ek Bharat, Shreshtha Bharat’ hnuai ami anih thu sawiin, hemi thil tum ber chu India mipui, state hrang hrang ami te inpawhtawnna siam nan a mahni hnam zia pho lanna hun siamsak anih thu a sawi. He programme hi ram inpumkhatna atana kawng pawimawh tak anih ngei a beisei thu a sawi bawk.

Governor thusawi kimchang : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-foundation-day-of-rajasthan-odisha

Vawiin a Rajasthan state kan tih hi March 30,1949 khan Jodhpur, Jaipur, Bikaner leh Jaisalmer ten United State of Rajasthan nen a inzawma rawn in din a ni a. Rajasthan state hi princely state hovin Instrument of Ascession an sign hnu a din a ni. Hemi hnu hian kum tin March 30 ah hian Rajasthan Day hman ziah a ni.

Odisha Foundation day hi a vawi 88 lawmna niin Utkal Diwas ti a sawi a ni bawk. Odisha hi a hma chuan Bihar state peng ami niin India ramah tawng hmang (linguistic basis)-a state then hran hmasak ber a ni. A hma chuan Odisha kan tih hi Kalinga peng ami ni thinin British ho khan hmun hrang hrangah kum 1803 khan an thenhrang a. Chumi hnu kum tam tak zalenna an sual hnuah 1st April, 1936 khan Bihar atang state hran niin an lo ding ta a ni.

He programme-ah hian Rajasthan Governor thuchah leh Rajasthan leh Odisha chungchang video tawi chu chhuah niin Dr. Akhilesh Kumar Sharma, Asst.Prof. Dept. of Hindi, MZU chuan Rajasthan history chungchang thusawi tawi a nei a. Ghumar, Rajasthan folk dance, NIT zirlai hnen atangin entir a niin Nisha Kumari, NIT zirlai hnen atangin Rajathan folk song ngaihthlak a ni bawk. Dr. Kailashkant Nayak, Asst. Prof. Dept. of Philosophy hnen atangin Odisha history leh culture chungchang ngaihthlak a ni a. RIPANS zirlai hovin Cheraw kanna neiin thalakna hunin he programme hi khar a ni.