Vawiin chawhma dar 11:00 khan Pi Renu Sharma, Secretary GAD, Finance etc. Government of Mizoram chuan Serchhip District tlawhin DC meeting Room-ah Serchhip District chhunga officer kalkhawnte a kawm. District Bawrhsap Pu P. Lalchhuanga kaihhruai inkhawmah hian Pi Sharma-i chuan Secretariat Office-a thu ringawt lova District inrelbawl dan a hmuna tlawh a, an dinhmun leh harsatna neihte a hmun ngeia hmuh theih chu tha a tih thu leh nuam a tih thu a sawi a ni.

He inkhawmah hian Bawrhsap chuan Pi Sharma-i chu Serchhipin a lo lawm tih hrilhin Serchhip District dinhmun tlangpui leh department hrang hrangte hnathawh leh hmachhawpte powerpoint hmangin a lo entir a. Serchhip District chu district te ber ni mahse ram lailia a awm avang te, ziak leh chhiar lama kan san avang te leh dan leh thupek kengkawhtute thahnemngaihna azarah, district ralmuang ber leh thubuai te pawh a nei tlem ber kan nih thu te a sawi a. Serchhip District-in District Jail kan neih loh avanga department hrang hrangte harsatna te, DC office leh a pengte-a hna ruak hrang hrang hnawh khah loh tam tak ten hna thawh an tih harsat thin thu te a lo hrilh bawk a ni.

Pi Sharma-i pawhin a ngaihpawimawh zawngte sawiin sawrkar hnathawk hlawh la thei lo an awm leh awm loh thu te, Ration card lem man chhuah chungchang te leh Internet connectivity rintlak a awm a tul thu te sawiin District Bawrhsap Office-ah mipui ten an vui vaina leh harsatna an thlenna hmun tur Public Greviance Redressal Officer incharge dah ngei tul a tih thu te pawh a sawi bawk a. Hei bakah hian Socio Economic & Caste Census atana hman tur PC Tablet chu a siamtu company ECIL ten vawi lehkhata an pek chhuah rual vek theih loh avangin Aizawl leh Kolasib District te pek phawt an ni a, March 1st atangin Serchhip District a hman tur a lo thleng dawn a, hun tiam chunga zo hman ngei turin Charge Officer-te an lo inpeih ngei ngei a tul dawn a ni tih a sawi bawk.

Officer-te nena meeting an neih zawh hian District inawpna atana pawimawh em em District Jail Building, Chhiahtlang a mi chu a kaihhnawih department sawm bikte nen Pu Robert C. Lalhmangaiha SDC leh NLUP Nodal Officer ni bawk kaihhruainain an en ho nghal a ni.