Transport Minister Pu P.C. Zoram Sangliana chuan a chanpual department hrang hrang tana tul buaipuiin New Delhi-ah a cham mek a ni.

Transport etc. Minister Pu P.C. Zoramsangliana chuan Pu Paban Singh Ghatowar, Minister of DoNER chu nimin Feb ni 8 khan a office, Vigyan Bhawan Annexe ah a kawm a, Govt. Press tihchangtlunna leh NE Regional Youth Centre sakna tur chungchang leh tul dangte sawipuiin chak taka hma lo lakpui a lo tiam bawk. Pu Zoramsangliana hian Pu P.K. Pattanaik, Joint Secretary, Ministry of DoNER pawh hmuin Govt. Printing Press tihchangtlunna atan 2nd installment sum release dan tur a sawipui a. Pu Pattanaik chuan lehkha pawimawh la kimlo te siamfel a nih veleh lo chinfel nghal a lo tiam bawk a, Minister chuan hemi atana tul lehkha te lo buaipui nghal turin Department officialte a hriattir nghal bawk. Pi Jayshree Mukherjee, Joint Secretary (NEC), DoNER pawhin North East Regional Youth Centre, Jorabat, Assam-a sakna tur ruahmanna chu lehkha pawimawhte dawn a nih ruala lo bawhzuisak a lo tiam bawk a ni.

Hemi ni vek hian tlaiah Embassy of Republic of Korea tlawhin Ambassador Pu Kim Jong Keun leh First Secretary, Culture & Press Pu Kim Kum-Pyoung te nen an inkawm a. Minister-in kumin Chapchar Kut hmanpui a Korean Cultural Troupe te nena Mizoram tlawh tura a sawmna chu chak hle mahse hun a chawpchilh deuh avang leh hetih hun lai hian an ram lamah duty pawimawh an lo neihsa avangin an remchan rih loh tur thu an hrilh a. Nakum lamah erawh chuan India leh Korea inlaichin tawnna kum 40-na denchhena Cultural programme hman turah Mizoram pawh tlawh theih ngei tura ruahmanna siam an tum thuin an lo chhang a ni. Hemi tihhlawhtlinna atan hian Delhi Mizoram House official-te nen rawtna mumal la siam zui turin thu dah a ni.

New Delhi a cham chhung hian Transport Minister chuan hetiang hian hmalakna dang a nei bawk a ni : Pu Alok Chandra, Director, Department of Expenditure, Ministry of Finance nen inhmuin Mizorama hmun hlui hriatreng tlakte (Heritage Sites) humhalhna leh cheibawlna atana 13th Finance Commission atanga sum hmuh beisei chu February ni 13-a Ministry of Culture nena meeting neih turah pek ngei turin a lo tiam a ni.

Pu B.P. Bhuker, Under Secretary, Ministry of Culture pawhin Multipurpose Cultural Complex, Sazaikawn, Lunglei ami sakna atana 2nd installment sum cheng nuai 72 chu a release-na atana lehkha pawimawh department-in an thawn chu la hmukim rihlo mahse Minister-in a copy a pek chawp hmangin lo hma lo lak nghal a lo tiam bawk.

Pu C. Radhakrishnan, APS to Minister, Road Transport & Highway pawhin a thawhpui officer ten nen Minister hi a thlenna Mizoram House-ah kawmin Transport Department hnuaia hna kal mekte an sawipui bawk.

Minister hian a hun chep tak karah, India rama football club-te inelna sang ber I-League atana trial match, Dr. Ambedkar Stadium, New Delhi a khelh mek a Mizoram atanga telve Luangmual FC leh PIFA Colaba FC te inkhel chu rei vaklo thlirin a tawiawm a, Luangmual FC player-te chu fuihna leh duhsakna thu hlanin Rs. 3000-in a tanpui bawk. He inkhelah hian Luangmual FC chu 2-1 in an chak a ni.