Vawiin chawhma dar 10:30 khan Health Directorate Conference Hall, Dintharah TB enkawlna chungchang 4th Quarter 2011 Review Meeting chu Dr. Gautam Borgohain, WHO Consultant hova neih a ni.

Meeting hi Dr. Vanlalhruaii, State TB Officer in a kaihruai a. He hun hmanpuitu Dr. C. Lalthanmawia, Director of Health Services chuan TB vei enkawlna lama thawk tuten tihtakzeta TB case hmuhchhuah leh enkawlna kawngah tun aia tan la lehzual turin a fuih a. Tunah hian MDR -TB te enkawlna DOTS Plus Site Falkawn-ah siam mek anih thusawiin, hetah hian TB damdawi pangngaia dam zo tawhlo te enkawl tur an ni a, MDR-TB te hian damdawi a thlawna an dawn bakah District TB Centre leh DOTS Plus Site-a an kalna leh an kalpui te kal man senso hi pek sak an ni ang a, Investigation pawh a thlawn a tih vek a ni ang ati. Health Director chuan natna tam tak kan vei te hi chu inven theih ani a, kan taksa tana thalo ni a kan hriatreng pawh kan tihluih thin avangin natna kan kai phah mai bakah sum tam tak kan khawral phah bawk a, Vaihlo kaihhnawih lam te pawh Mizo te hian kan ti nasa hle a, hengte pawh hian TB natna vei a tihpun phah bawk a, heng natna hrang hrang laka kan inven nan leh kan lo hrisel zawk theih nan kan taksa theuh kan vawn uluk a, insum theihna kan neih leh zual a ngai hle a ni a ti bawk.

Dr. Vanlalhruaii, STO pawhin PMDT (Programmatic Management of Drug Resistant) chungchang sawiin TB vei enkawlnaah hian damdawi chi nga hman thin ani a, heng damdawi panga (5) zinga pahnih Isoniazid leh Rifampicin hi TB vei ten an ei a, an taksaa a TB hrik awm a tihhlum theih loh hian Multi Drug Resistant TB (MDR-TB) vei kan tih te chu an ni a. A dang damdawi pathum te pawh hian TB hrik chungah hna thawk mahse, an hnathawh tur angin an thawk thei lova, chuvang chuan MDR-TB anga ngaih tho an ni. Chuvangin TB vei ten an damdawi ei tur ang tha taka an ei zawh a pawimawh hle a ni.

He quarterly review meetingah hian Oct – Dec 2011 chhunga TB vei hmuhchhuah chungchang chhui bingna neih a ni a. Report khaikhawmna a landanin, nikum Oct – Dec 2011 chhunga TB vei thar hmuhchhuah zawng zawng chu mi 511 an ni a, an zinga mi 111 chu an khakah TB hrik hmuh an ni. Kum 2011 chhunga Mizorama TB vei hmuhchhuah zawng zawng chu mi 2300 an ni a, an zinga mi 495 chu an khakah TB hrik hmuh niin, heng TB vei zinga 86% chu enkawl dam an ni.

He meeting-ah hian CMAI ( Christian Medical Association of India ) leh ZEP (Zoram Entu Pawl) te nen TB enkawlna chungchanga thawh hona chungchang review-na neih a ni bawk a, TB leh HIV inlaichinna chungchang sawi hona neih a ni bawk. Kum 2011 chhung khan TB vei hmuhchhuah zingah HIV hrik pai tel mi 167 an awm a ni.

He meeting-ah hian Dr. Ramfangzauva, Jt. Director (Planning), Dr. Gordon Zohmingthanga, Mission Director (NRHM) bakah District hrang hrang atangin Chief Medical Officer, District TB Officers, Senior Treatment Supervisors, Senior TB Laboratory Supervisors, TB-HIV Supervisors te he meeting-ah hian an tel.