Gauhati High Court, Aizawl Bench chuan 73rd India Independence Day,2019 chu vawiin khan an office thut hmun Govt. Luangmual Complex-ah Justice Michael Zothankhuma, Judge, Gauhati High Court hovin an hmang. Zing dar 8:00 ah Justice Michael Zothankhuma hian hnam puanzar a pawt pharh a, zahna chibai 225 Bn.CRPF ten an buk a ni.

73rd India Indepencence Day Lawmna Gauhati High Court, Aizawl Bench-a neihah Justice Michael Zothankhuma chuan thu sawiin zalenna sual chhuaktu mi ropui kaltate kha hre reng a, zalennain mawhphurhna a ken telte chu India Danpui hian dikna chanvo ram mipuite a pek rual hian mawhphurhna pawh an koah thui tak a innghat a ni a ti a. India ram ropui tak chhungah Zofa-te pawh zalen takin hun an hmang mek a, he ram a lo ropui leh zual zel nan mitinin mawh an phur theuh a, mahni hma zawnah tih tur chu dik tak leh huaisen taka tih zel chuan ram hian hmalam a pan zel ang a ti. India Danpui hnuaiah hian lungthu pathum pawimawh tak tak a awm a, chungte chu -Legislature, Executive leh Judiciary te hi an ni a. Heng pathumte zingah pawimawh bik emaw pawimawh lo bik emaw pawh an awm chuang lova, heng zingah Judiciary hi ram inrelbawlna huang chhungah hian a la naupang viau mahse hmuh theihin a thang em em a ni a ti.

Gauhati High Court, Aizawl Bench-ah hian hun rei tawh tak atangin hetiang ang Ni pawimawh Republic Day leh Independence day hi urhsun takin hun hman a lo ni tawh thin a, nakin lawkah phei chuan New Capital Complex-ah High court Building tha tak an la luah thuai beisei a ni a ti.

Kum khat kalta chhunga Gauhati High Court, Aizawl Bench hnuaia hmalakna leh hnathawh hrangte Justice Michael Zothankhma'n vawiina a tarlante chu :

HIGH COURT CASE DINHMUN :
1.August ni 15,2018 leh August ni 9, 2019 chhungin civil case 373 lut a awm a, hemi hma hian cilvil case 401 a awm bawk a, tihian a vaiin civil case 774 a awm a ni. hemi chhung hian civil case 405 chinfel a ni a, tunah hian civil case chinfel loh 369 a awm ( As on 09.08.2019 ).

2. August ni 15,2018 leh August ni 9,2019 chhungin criminal case 97 lut a awm a, hemi hma hian criminal case 42 chinfel loh a awm bawk a, ti hian a vaiin criminal case139 a awm a ni. August ni 15,2018 leh August ni 9,2019 chhung hian criminal case 67 chinfel a ni a, tunah hian criminal case chinfel loh 72 a awm a ni.

DISTRICT COURT DINHMUN HRANG HRANG-TE - ( 15.8.2018 – 14.8.2019 ) :
1.    Judicial Officer Grade-II Pi Vanlalchami chu Grade-I-ah a kaisang a, Pu H.Lalduhsanga-Grade-III chu Grade-II ah a kaisang bawk.
2.    Judicial Officers’ Training, Judicial officer te intuaihriamna tur hi a khat tawka buatsaih reng a ni a, Ni 21st Nov,2018 khan Civil & Criminal Law Matters tih thupui hmangin intuaihriamna neih a ni. Ni 2 & 3rd August,2019 chhung khan Grade-II & III Officer te tan training neih leh a ni a, thupui ‘Judicial knowledge Enhancement programme’ tih a ni. Heng training-ah hian Judicial Officer te an kal tha hle a, hlawk thlak an ti hle a ni.
3.    Judicial Quarters Grade- II & III, Champhai leh Lawngtlai-ah te sak zawh tawh a ni a, District Court hlui, Champhai a mi pawh thawm that a ni.
4.    District Court building, Siaha leh Judicial Officer Quarters 7 Unit chu tunah hian hna kal lai mek a ni a, Grade-1 quarter hi Siaha-ah sak mek niin  Grade-I,II,III quarter hi Serchhip leh Mamit-ah tih mek a ni bawk.
5.    Sub-ordinate Courts a case dinhmun chu : 1) Civil ah lut thar 5,651 a awm a, pending awmsa 3,132 nen a vaiin 8,783 a ni. Case chinfel zat chu 6,171 a ni. Tuna Civil pending la awm mek chu 2,612 a ni.
2) Criminal ah lut thar 8,362 a awm a, pending awmsa nen 3,458 a vaiin 11,820 a ni. tuna criminal pending la awm mek chu 3,499 a ni.
6.   SSB, Kolasib ram hlui chu tunah hian Revenue leh Village Council,Project veng te nena insem turin LSC tifel tura hmalak mek a ni a, hei hi Fast Tract Court ram tur a ni.
7.    District Court, Champhai hmun tur atan Cabinet meeting chuan CHANEM pek a remti.
8.    Lunglei-ah Court building tur zawn mek a ni a, heng bakah hian High Court leh District Court, Aizawl leh Lunglei tan Scanning & Digitization of Case Records chu June,2019 atangin hna tan a ni a, tunah hian software development hna thawh mek a ni.

HIGH COURT JUDGES LIBRARY :
High Court Judges’ library-ah hian dan chi hrang hrang lehkhabu neih belh mek zel a ni a, nikum 15th August,2018 atanga tun hun thleng hian lehkhabu 674 neih belh a ni. Tunah hian chhinchhiah danah chuan a vaiin 14,922 lehkhabu Judges’ library-ah hian a awm mek.

HIGH COURT BUILDING LEH JUDGES BUNGALOW :
Tunah hian New Capital Complex hmun nuam takah High Court building hi hna chak taka kalpui mek a ni a, hna thawh tawh zawng zawng hi za zelah 42% zawh tawh a ni.

Govt.Luangmual Complex hmun, tuna High Court office luah mek bul lawkah hian Judges’ Bungalow Block-II chu sak zawh tawh a ni a, a bulah hian Chief Justice Bungalow pawh sak zawh tawh a ni bawk. Judges’ Bungalow Block-I hi sak mek a ni a, hna chak taka kalpui mek a ni.

High Court-a Independence Day lawmna hunah hian Pu L.H. Lianhrima, President, Mizoram Bar Association pawhin thusawiin Pi Margaret Lalrinsangi, Joint Registrar, Gauhati High Court, Aizawl Bench in lawmthu sawiin hun a khar a; Khuallianin naupang lokal te hnenah sweet a sem zui nghal a ni.

Attachment

  • Loading attachment...