2663/2023-2024

Aizawl, the 4^th November, 2023: General Election to the Mizoram Legislative Assembly, 2023 atan Postal ballot hmangin vote thlak mek zel a ni a; hriattheih chinah ni 04.11.2023 tlai dar 5:00 thleng khan Home voting 2,059 leh Facilitation Centre voting 8,526, avaiin vote 10,585 a tla a ni.

Vote thlak dan District wise report kimchang chu hetiang hi a ni:- 

General Election to Mizoram Legislative Assembly, 2023 atana inpuahchahna kalpui dan chungchangah Chief Electoral Officer (CEO) Pu Madhup Vyas, IAS chuan vawiin chawhma dar 11 khan District Election Officer (DEO) te, RO te leh Critical Polling Station leh P-2 a duty tur Sector Officer-te Video Conference kaltlangin meeting a neihpui a; hmalak tawh dan leh ruahmanna an neih dante thlirho a ni. Meeting-ah hian CEO Office atangin Addl. CEO-I Pu H.Lianzela, Addl. CEO-II Pu Amol Srivastava, Jt. CEO Pu James Lalnunmawia, Dy. CEO-I Pu R.Vanrengpuialeh Dy. CEO-II Pu Henry C.Lalrawnkima te an tel bawk.

ECI remtihnain Mizoram chhunga Polling Station 149 te chu P-2 (P minus 2) ah puan niin, hengte hi kalpawh harsa deuh leh thlen nana hun duh reite an nihhlawm avangin inthlan hma ni 2 ah Polling party-te chhuah phalsak an ni a; heng zinga engemawzahte hian naktuk hian an duty-na tur Polling Station an pan tawh dawn a ni. Hetihlai hian mahni khaw lama vote thlak turte pawhin an khaw lam an pan mek zel bawk.

ECI thupek angin Campaign tawp hun naktuk November ni 5, 2023 (Pathianni) tlai dar 4:00 atanga vote thlakni November 7, 2023 (Thawhlehni) tlai dar 4:00 thleng,darkar 48 chhung hi Section 126 of RP Act, 1951 sawi angin 'Silent Period' a ni a. Hemi hun chhung hian Political campaign rawng kai reng reng neih phal a ni tawh dawn lo a ni. Electronic Media-te tan pawh election campaign lam thil kaihhnawih mipui rilru sukthlek tidanglam thei thilte tarlan/chhuah a rem tawh lova, MCMC pawmpuina hmu hmasa lovin Print media kaltlanga Political advertisement chhuah khap a ni a, mipui ngaihdan lakna 'Opinion Poll' siam khap a ni bawk. Constituency pawn atanga Candidate puitu campaigner-te pawhin an campaign-na hmun an chhuahsan vek tawh tur a ni. Election Commission of India chuan Sec 126A of RP Act tlawhchhanin November ni 7,2023 zing dar 7:00 atanga November ni 30, 2023 tlai dar 6:30 thleng  'Exit Poll' siam a khap a, Dry Day puan a nih avangin zu leh ruihtheih thil zawrh leh in khap tlat a ni bawk. 

Model Code of Conduct leh Election kaihhnawih dan siamte hi Candidate, Political Party leh Sawrkar hnuaia awm zawng zawng ten tha taka zawm chhunzawm zel turin CEO Mizoram chuan a ngen nawn leh a; hremna dan lekkawh ngai kherlova mahni inthunun (self regulate) theuh turin a ngen a ni.