3322/2023-2024

Aizawl, the 12th January, 2024: Media Cell, CEO Office buatsaih General Election to the Mizoram Legislative Assembly, 2023 neih zawh taka ni tin chhuak Chanchinbu zinga mipui hnena Election chungchang leh vote thlak tura inzirtirna lam hawi kalpui tha thlanchhuahte hnenah vawiin chhun dar 12:00 khan Addl. CEO Dr. H. Lianzela, Nodal Officer, Media Cell, CEO Office-in lawmman a hlan.

Dr. H. Lianzela, Addl. CEO & Nodal Officer, Media Cell, CEO Office chuan General Election to Mizoram Legislative Assembly, 2023 kalpui chhunga mipui zirtirna pek kawnga media kaltlanga hmalakna chak zawk a awm theih nana intihsiakna buatsaih a nih thu sawiin, tehfung hrang hrang siamte zulzuia endikna kalpui a ni, a ti a. Lawmman sem chhuahna hun ngaipawimawha tel MJA Gen Hqrs. hruaitute leh lawmman dawngtu, District hrang hrang 3 atanga telte fakawm a ti a. Media-te chu democracy khaidingtu leh vawnghimtu pawimawh tak 'fourth pillar of democracy' an nih thu sawiin, an pawimawhna ECI in a hmuh hmaih lova, hmalakna pawimawhahte a telh zel thin a ni, a ti a. Inthlan kaihhnawih thuchhuah leh inkaihhruaina siamte tha taka media-te'n an zawm thin leh thuneitute thu an ngaichang thin chu fakawm a tih thu a sawi bawk.

Dr. H. Lianzela chuan Media-te chu thil chik leh zirchiang peih mi nih tum tur leh, tunlai thiamna mil zela intuaithar peih mi nih tum turin a chah a. Khawvel changkang zel kentel thiamna mila insiamrem thiam tur leh chanchin thar thehdarh kawngah pawh tunlai thiamna chhawr tangkaia  digital technology nena kalkawp thiam tum turin a fuih a. Inthlanna felfai, dik leh langtlang hlawhtling taka buatsaih a nih theih nana thahnemngai taka thawktute inpekna fakawm a tih thu a sawi a. Kan hma lawka neih tur Lok Sabha Election 2024 ah thawhhona tha zawk neih leh ngei a nih theih nan Chanchinbumite tawiawmna a ngen nghal bawk.

Thusawitu dang Pu C. Lalhmachhuana, Treasurer, MJA Gen Hqrs. chuan inthlanpui neih zawh taka Official leh Press mite inkara thawhhona tha tak a awm leh chanchin thar kimchangte inhriattir zung zung a ni thin chu lawmawm a tih thu a sawi a. Media Cell Nodal Officer Dr. H. Lianzela, Addl. CEO leh a thawhpuite inpekna fakawm tiin, CEO Office-in inelna thianghlim a buatsaih chu finthlak a tih thu a sawi a, Press mite ngaihpawimawh an ni thin chu lawmawm a tih thu a sawi bawk.

Lawmman dawngtu Editor-te hnen atangin thusawi ngaihthlak a ni a. CEO Office kaltlanga Media-te ngaipawimawha inthlan kaihhnawih mipui zirtir leh hrilhhriat kawnga hmalakna zau zawk buatsaih a ni chu lawmawm an ti a. Inthlanpui neih zawh taka vote tla percentage tha tak neih a ni chu ropui an tih thu leh vote thlak tura mipui zirtir chu an ngaihpawimawh zel tur thu an sawi a. Mipui zirtir leh kaihhruai chu khua leh tui nihna zawna mawhphurhna neihte an hlenchhuahna pakhat a nih thu an tarlang bawk.

Lawmman sem chhuahna hun Addl. CEO Dr. H. Lianzela Pisa, MINECO-a neih hi Dr. Lallawmkima, IPRO, Media Cell chuan kaihruaiin tehfung hrang hrang hmanga endikna kalpui a nih dan a sawifiah a. Pu Vanlalringa, SIO, Member, Media Cell, CEO Office-in lawmthu sawiin hun hman a khar a ni.

Intihsiakna hi October ni 26, 2023 atanga November ni 6, 2023 chhung khan neih niin, tehfung hrang hrang (Frequency, Editorial, Headline & First page top corner slogan) hmangin endik a ni a, November ni 15, 2023 khan result puan a ni. Lawmman hian Citation bakah pakhatnain pawisafai Rs. 30,000/-, pahnihnain Rs 20,000/- leh pathumnain Rs 10,000/- a kengtel a ni.

General Election to Mizoram Legislative Assembly, 2023 kalpui chhunga mipui zirtir kawnga Chanchinbu hma la tha Media Cell, CEO Office-in a thlanchhuahte chu:-
1) Virthli (Aizawl), Editor - K. Zothankhuma
2) Lenrual (Champhai), Editor - Lalhlupuia
3) Zothlifim (Serchhip), Editor - C. Lalrochhuanga

Media Cell, CEO Office chuan lawmman dawngtute thinlung takin a lawmpui a. Heng bakah hian hmalakna ngaipawimawha tihlawhtlingtu inelna huanga tel Chanchinbu dang zawng zawngte inpekna leh tawiawmnaah lawmthu a sawi a. Inthlanna zalen, dik leh felfai hlawhtling taka buatsaih a nih theihna kawnga Media-ten ECI inkaihhruaina tihchhuah leh CEO Office-in thuchhuah a siamte tha taka an zawm thin avangin Media Cell, CEO Office chuan lawmthu a sawi bawk.