102/2024-2025 

Hnahthial the 9th April 2024: 1-Mizoram Parliamentary Constituency General Observer Dr Nipun Vinayak (IAS) hovin vawiin khan kan hma lawka MP inthlan lo awm tura Mizoram Parliamentary Constituency huam chhunga hman tur EVM khawl thliar fel thawh hnihna (2nd randomization of EVMs) chu video conference hmanga neih a ni a, Aizawl District Bawrhsap, RO ni bawk Pi Nazuk Kumar chuan he hun hi kaihruaiin District hrang hrang DEO ten an tel pui bawk.

EVM randomization thawh hnihnaah hian Siaha a cham mek General Observer Dr Nipun Vinayak (IAS) chuan boruak muanawm tak hnuaiah inthlan chu huaihawt a nih a beisei thu a sawi a, tun thlengin buaina lian tham emaw, harsatna lian tham a la awm lo tih tarlangin lawmawm a tih hle thu a sawi bawk.

Vawiin randomization-ah hian District hrang hrang, Assembly Segment 40 a hman tur EVM thliar fel an ni a, 1st randomization a EVM thlan fel tawh atangin an Assembly Segment leh Polling Station kalna tur ruat fel a ni. 29-South Tuipui (ST) AS bikah chuan Polling Station 27-a hman tur EVM khawl 27 ruat fel a ni a, hei bakah hian reserve a awm tur Ballot Unit 12, Control Unit 12 leh VVPAT 14 ruat fel an ni bawk. EVM hman theih tura ruat felna (Commissioning) hi April ni 12 leh 13 a neih tura ruahman a ni bawk a ni.