50/2024-2025 

Champhai, the 4th April, 2024: General Election to Lok Sabha, 2024 hnuaia 1-Mizoram (ST) Parliamentary Constituency atana Election Commission of India (ECI) ruat General Observer Dr. Nipun Vinayak, IAS chuan election inbuatsaihna kalpui dante enfiah turin vawiin chawhma khan Champhai a thleng a, Nodal Officer-te meeting a neihpui.

General Observer Dr. Nipun Vinayak chuan Lok Sabha inthlanpui atana Champhai District inpuahchahna tha tiin, thawhhona tha tak an nei chu fakawm a tih thu a sawi a. Thlen chinah duh tawk mai lova theihtawp chhuah chhunzawm zel turin Nodal Officer-te a fuih a, thawhpuite nen lungrual taka thawk tur leh awm hmuna awm mai lova, inthlan boruak thlithlaia pawn lam dinhmunte pawh ngaihven fo turin a chah nghal bawk.

District Election Officer Pu James Lalrinchhana chuan Champhai District-ah inthlanna muanawm leh felfai tak neih a nih thin thu sawiin, Lok Sabha Election atan inpuahchahna tha taka kalpui a nih thu leh inthlanna muanawm leh felfai tak neih a nih leh ngei a beisei thu a sawi a. General Observer-in Champhai District a rawn tlawh chu lawmawm tiin, district aiawhin lawmthu a sawi a, a cham chhunga hun hlawkthlak tak hmang turin duhsakna a hlan a ni.

General Observer hian vawiin chawhnu dar 12:30 khan DC Conference Hall-ah District Election Officer, SP, Dy. District Election Officer leh Nodal Officer hrang hrangte meeting a neihpui a. He hunah hian inthlanna muanawm, felfai, dik leh langtlang neih a nih theih nana hmalakna leh mawhphurhnate sawiho niin, ruahmanna leh hmachhawpte sawiho a ni bawk a. Nodal Officer-te hnen atangin report ngaihthlak niin, District Election Management Plan (DEMP) leh Segment Profile buatsaih chu DEO in General Observer hnenah hian a hlan nghal bawk.