Health Minister Pu Lal Thanzara chuan vawiin khan Aizawl Civil Hospital ah man tlawm zawka damdawi lei theihna dawr Jan Aushadhi Store (Generic Drug Store) a hawng.

Generic Drug Store hawn a nih theih nana tha thawhtu zawng zawng chungah lawmthu sawiin Pu Lal Thanzara chuan retheite ngaihsaktu sorkar hmalakna in mirethei leh harsa zawkten man tlawm taka inenkawlna damdawi an lei theihna tur dawr hawn a lo ni ta chu a lawmawm takzet a ni, a ti.  Health Minister chuan sorkar chu mipuite ta a nih angin mipuite himna, ei leh bar zawnna leh hriselna ngaihtuahte chu a hna pawimawh tak a ni a, hemi kawngah hian Mizoram sorkar chuan nasa takin tan a la a ni, a ti a. Nu nauchunga thi (MMR) leh nausen pianghlim thi (IMR) tih tlemna tur pawhin sorkarin tan a la a, tunhnaiah a chhan zirchiang tur leh a tihtlem dan ngaihtuah turin phai lam mithiam rual an lokal a. Heng an thil hmuhchhuah bawhzui hian IMR leh MMR tlakhniamna turin sorkarin theihtawpin tan a la dawn a ni tih sawiin District tina Chief Medical Officer te chu tun aia nasa a hma la tur leh an enkawl District chhungah thawktute uluk leh zuala vil turin a chah a ni.

Pu Lal Thanzara chuan Aizawl Civil Hospital thuam that nana sorkar hmalakna thenkhat sawiin chung zingah chuan Operation Theatre (inzaina) leh damlo inthiarna leh ward chei that mek a nih thu te, a bikin surgery leh ruh lam zaina (ortho) OT chu khar rih niin ruh zaina OT bik chu vawiin atanga a chanve hman theiha peihfel leh hawn a nih leh tak thu te; Semi Cabin cum Geriatric Ward building sak mek te, Dental OPD leh Ward sak mek te; State Medical Library sak mek te, Central Sterilisation Department khawl thar lei a nih thu leh hman theih mai tura bun mek a nih thu  te leh Microbiology Department-ah natna hrik enna, septicemia veite hriat zung zung theihna tur cheng nuai 30 chuang man khawl thar bun fel a nih tawh thu a sawi a. Mi rethei natna khirh veite tana sorkar laipui scheme hrang hrang – BPL chhungkua a cancer damlo tan cheng nuai 2 thleng enkawlna dawn theihna Health Minister’s Cancer Patient Fund te, kum 1 a cheng nuai 1 hnuai lam sum lalut chhungkuate tan natna khirh dana zira cheng nuai 1 thleng sum hmuh theihna Health Minister’s Discretionary Grant leh BPL damlo te tan bik natna serious dan a zira cheng nuai 2 thleng hmuh theihna Rastriya Arogya Nidhi (RAN) chung chang tarlangin Health Minister Pu Lal Thanzara chuan damlo mi harsa tak tak te’n hei hi an chhawr tangkai ngei theih nan ngaihven thin turin mipuite a chah a ni.

Vawiina hawn tak  Jan Aushadhi Store (JAS) hi sorkar laipui Ministry of Chemicals and Fertilizers hnuaia Bureau of Pharma PSUs of India (BPPI) hmalakna a ni a. JAS Scheme in a tum ber chu mirethei zawk ten damdawi tha man tlawm zawka an lei theih a, ram mipuiten hriselna tha an neih theihna tur ruahmanna a ni a. Damdawi hi a man to dan a zirin category 3 (A,B,C)  ah then a ni a. A man to chi chu – A, a laihawl – B, a man tlawm chi – C tia bithliah a ni. Jan Aushadhi dawrah hian Group B thleng phak damdawi a awm mang lo. Damdawi dang man tona chhan ber chu a tuamna (packing) leh a cheimawina te a ni a, a man tlawm avanga quality chhe chuang lo Generic/Jan Aushadhi damdawite hi a man a tlawm theihnan a tuamna changkang lo leh a hralhna hlep pawh tlemte a ni. Jan Aushadhi/Generic damdawite hi National Accreditation Board for Testing and Calibration Laboratories (NABL) pawmpui laboratory ah a that leh that loh uluk taka enfiah vek a ni.  Tunah hian cheng nuai 13 man hu damdawi chi hrang hrang 153 chah thlen a ni tawh a ni.

JAS damdawi leh market damdawi rate inthlauhna chu hetiang hi a ni: