Vawiin khan Saikuti Hall, Lunglei-ah ‘NSS Programme Officers leh Volunteers Orientation Training’ neih a ni a, Parliamentary Secretary i/c School Education Pu Joseph Lalhimpuia’n a hmanpui.

Training Programme hawnna inkhawm Dr.Lalzuiliana, State Liaison Officer & Deputy Secretary, NSS Cell, Dept. of Sport &Youth Services kaihhruaiah Pu Joseph Lalhimpuia chuan NSS Programme chu a taka lanchhuah tir ngai, mahni aia midang dah pawimawh zawkna a ni a, hei hi chhungkuaah, zirna inah leh khawtlangah nunpui a ngai a ni, a ti. Chhimlamah NCC leh Bharat Scouts & Guides te pawh tih nun thar tum a ni a, hei hian hnam inpumkhatna leh inunauna tha a siam ang a, khawtlang leh ram nuam a siam thei ang, a ti bawk. Education Department-in ‘Clean Mizoram’ ah hma a la mek a, mipui vantlangah fai leh thianghlimna inzirtir a pawimawh hle a; ram faina kawngah zirlaite pawhin mawhphurhna an nei a, naupanlai atangin bawlhhlawh chu a paihna hmunah chauh paih turin inzirtir a tul a ni, a ti a. Zirna kawngah Pathianin tumah thiamna a bik takin a pe hran lova, a thawkrim leh taima apiangin hlawhtlinna an hmu zawk thin a, mahni inthunun theite chu mi ropui leh mi langsar an ni fo thin tiin Pu Joseph Lalhimpuia chuan zirlaite a fuih. NSS Programme Officer leh Volunteer te chu mi tana hnawksak ni lovin tanpuitu an ni a, tawngkam ringawt nilovin a takin mite thinlung hneh theih turin thawh a ngai a, chumi atan chuan programme pawh siam thiam a ngai dawn a ni, a ti bawk. Central sorkar-in Southern Battalion NCC din phalna a pek tawh chu reiloteah RMSA kaltlangin vocational training hawn a nih tur thu a sawi bawk.

Secretary, Sport & Youth Services Pu Zothankhuma pawhin thu sawiin NSS chu thalaite tana hmalakna kawng pakhat a ni a, zirlaiten an zirna piah lamah mipui rawng an bawl ve theihna a nih avangin kum khatah darkar 120 hman tur a ni, a ti a. NSS-in a tum ber chu khawtlang tih hmasawn a ni a ti bawk.

SLO & Dy. Secretary, NSS Cell Dr.Lalzuiliana chuan ‘Aims and Objectives’ tih thupui hmangin NSS volunteer-te training a pe a. Vawiin chawhnu vekah NSS Programme Officer training/meeting neih nghal a ni a, a thurelte zingah Special Camping neih dan tur te, RA Programme kalpui dan tur te, Mizoram pawna programme neih dan tur te, National & State Level PO & Volunteer Award siam te leh NSS programme-a Social Media hman tangkai dan turte a tel a ni. Vawiin NSS Training-ah hian Lunglei, Lawngtlai, Serchhip leh Saiha PO te an tel a ni.

Attachment

  • Loading attachment...