1713/2025-2026

Aizawl, the 3rd October 2025 : Vawiin khan Geological Society of Mizoram (GSM) chuan an General Body Meeting vawi 7-na chu Pachhunga University College Seminar Hall-ah an nei a. He hun hi Commerce & Industries Minister, Pu F. Rodingliana chuan a hmanpui a. Kalkhawmte chu eizawn nan maia an thiamna hmang lovin, Mizoram himna leh leilung hausakna hai chhuahna lama hma la turin a fuih a ni.

Leilung zirmite inhmuhkhawm hi an pawl President Dr. J. Malsawman a kaihruai a, Geologist-te hi ram leilung him nan leh ram hausakna hai chhuak turin mawhphurhna an neih san thu a sawi a. General Secretary Prof. Laldinpuian report pe in, an pawlah member 210 an awm mek thu leh, Mizoram leilung himna kawng leh hausakna kawnga hma an lak dan te leh, Geology zirmite hmasawnna leh hmachhawp mekte a sawi bawk. An pawl member thi sunna leh hlawhtlinna neite chawimawina hun an hmang a. Ph. D. nei thar 3, NET-JRF leh GATE nei thar 5 lawmpuina an pe. 

Directorate of Geology & Mining Director Pu J. Chamliana leh PUC Principal Prof. H. Lalthanzara ten thu an sawi bawk. Mizoram leilung hausakna hai chhuah dan dinmun leh hmathlir te zirhovin, DGM Geologist pahnih, Pu C. Malsawmkima leh Pu Malsawmdawngliana ten hun an hmang.

Pu C. Malsawmkima, Geologist hnen atang hian Mizorama lungalhthei dinhmun zirho a ni a. Mizorama a hmasaber atan Rotlang West (Lunglei District)-ah private agency M/s Maheswari Mining Pvt. Ltd. te chhawrin kum 2025 March thla atang khan, lungalhthei zawn nan lei verh tan a ni a. July 2025 thleng khan borehole 15 verh zawh a ni a. Coal band (lungalhthei awmna) hi hmun thumah hmuh a ni a, a chhah zawng hi 7cm, 12 cm leh 8 cm te niin, coal streak hmun tam takah an hmu bawk. Lungalhthei dinhmun (quality) dik tak (Coal sample result) hi ngaih chan mek a ni. Tin, Trace element leh Rare Earth Elements (REE) analysis tihna turin borehole pakhat a mi core (coal leh non-coal) National Metallurgical Laboratory, Jamshedpur, Jharkhand-ah thawn a ni a, test result-te hi nghah mek a ni. Hmalak chhoh zel nana zirna in hrang hrangte nena thawhho a tul dan sawiin, central sorkar lam atanga fund awm theih dan a sawi bawk.

Pu Malsawmdawngliana, Geologist hnen atangin, Mizorama leihriak (hydrocarbon- oil & gas) zawn hna leh a dinhmunte, Rare Earth Elements (REE) dinhmun a sawi a. Kum 2005- 2025 chhungin, leilung hausakna (minor minerals) atangin Rs. 63.05 crore leh PEL (Petroleum Exploration License) chhiah atangin 38.62crore, a vaiin 101.68cr sorkarah chhun luh a ni a; thla nga chhung (April to August, 2025) chauhin 2.16cr zet DGM-in an hmu a ni.

GSM inkhawmpuiah hian, State Govt. College leh Higher Secondary School lama science zir telna hmunah te Geology subject dah kim vek leh, zirtirtu lak belh tura sorkar ngen te, Online Lecture Series buatsaih thin te, leh State University hnuaia Geology zirna hawng tura rawtna thlen te a ni a. AMC hnuaia lei laih phalna (SD&SM) endik chungchanga hmasawn thei dan tur an sawiho bawk.