KUM 2024-25 ATANA BUDGET PHARHNAA FINANCE MINISTER THUSAWI

Pu Speaker,

I remtihnain, kum 2024-25 chhunga Annual Financial Statement pharh turin ka lo ding chhuak a ni.

THUHMAHRUAI

1. Vawiina he 9th Mizoram Legislative Assembly chhunga kan Budget hmasa ber pharh tura ka lo din chhuah hian, he Sawrkar lo ding thar mekin ram hmasawnna atana kan hmathlir leh ruahmanna kan lo siamte a taka thawk thei tura remchang min siamsaktu Mizoram mipuite chungah lawmthu ka han sawi hmasa duh a ni.   He Budget kan buatsaih laia kan ngaih pawimawh ber chu Zoram mipuite tana ei leh bar zawnna kawng tlo leh nghet zawk buatsaih hi a ni a. Chumi tihlawhtling tur chuan langtlang leh rintlak taka sum leh pai enkawl hi kan ngaihpawimawh hmasak tur a ni bawk a. Tin, heng sumte hian mipuite a thleng ngei a ni tih leh tangkai taka hman an ni ngei a ni tih va finfiah kha kan tum tlat bawk a ni.

STATE SAWRKAR SUM LEH PAI DINHMUN THLIRNA TLANGPUI

2. Pu Speaker, kan State GDP hi Covid hripui len lai khan tlem azawng a tla hniam tih loh chu harsatna tam tak karah a thang chho ve zel a. Kum 2022 - 23 chhunga kan economy thanna chu 10.14% a ni a, kum kal mek 2023 -24 chhungin 10.55% in a than kan beisei bakah, kum thar 2024-25 chhung phei chuan 11.03% a a la than theih kan beisei mek a ni. Kan State mipui ei leh bar zawnna kawngah hian tertiary sector kan tih mai, service sector hian hnuhma a nei lian ber a; industry sector, secondary sector kan tih bawk hian dawtin, Agriculture & allied sector atanga kan thawh chhuah hi a tlem ber thung a ni. Kum 2024-25 chhunga kan GSDP chu current price tehkhawnga

hmangin Cheng Vbc. 48037.52 ni tura chhut a ni a, kum 2023-24 RE-a kan GSDP chu Cheng Vbc. 39355.69 a ni. Tichuan, nikum RE atanga kumina a punna tur hi Cheng Vbc. 8681.83 a ni.

3. Kum 2023-24 BE-a kan Gross Fiscal Deficit Cheng Vbc. 1247.21 chu Cheng Vbc. 118.49-a pung chhoin Cheng Vbc. 1365.70 ni tura ruahman a ni a. GSDP atanga chhutin kum kal mek 2023-24 BE-a 3.47% leh RE-a 4.73% chu kum 2024-25 BE-ah chuan 2.84%-a khung tum a ni. Pu Speaker, kan sawi lan tel duh chu GSDP hi projection mai a la ni a, la danglam leh thei reng a ni thung.

4. Kum 2024-25 chhunga kan State-in kan thawh chhuah ve tur (State’s Own Revenue) chu beiseina sang tak nena ruahmanna siamin Total Revenue Receipt atanga 19.66% tling tur leh, Sawrkar sum hmuh zawng zawng (Consolidated receipt) atanga 16.89% tling thei tura ruahman a ni. Kan State bil thawhchhuah hi kum 2024-25 atana ruahman chu Cheng Vbc. 2434.81 niin, kum kal mek BE aiin 22.29%-in pung chho tura beisei a ni. A pun chhohna tura ruahmanna langsar zualte chu heng, GST (20.81%) te, stamps & registration fee (12.82%) te, vehicle tax (16.67%) te, interest receipt (10.20%) te leh non-ferrous mining (25.00%) te an ni.

5. State revenue pung chho tura ruahmanna te thlir chungin, kum 2024 -25 chhungin Revenue Surplus Cheng Vbc. 564.95 neih theih kan inbeisei a ni.

6. Sawrkar leiba tling khawm zawng zawng chu Cheng Vbc. 14034.76 a ni ang a, Debt/GSDP ratio chu 29.22% a ni ang. Kum 2023-24 BE-a kan Debt/GSDP ratio chu 37.84% a ni a, ziaawm lam pan chhoh hret hret kan beisei a ni.

7. Reserve Bank of India (RBI) hian State Sawrkarte chu reserve fund Account pahnih a vawnsak a, chungte chu Consolidated Sinking Fund (CSF) leh Guarantee Redemption Fund (GRF) te an ni. Heng fund-te hi State Sawrkarte'n contribution an siam atanga vawn an ni a. Consolidated Sinking Fund investment atanga interest nena tling khawmte chu State Sawrkar contingency liability rulhna atana hman tur a ni ber a. Kumin 2023 -24 chhunga CSF atana sum kan invest tawh chu Cheng Vbc 19.44 niin, Cheng Vbc. 12.96 invest belh leh tum a ni bawk a. Hemi nen hian kum kal mekah a vaiin Cheng Vbc. 32.40 invest a ni dawn a ni. Tichuan, February 2024 thlenga he fund hnuaia sum tling khawm tur chu Cheng Vbc 374.66 a ni. GRF erawh chu State Sawrkar-in a hnuaia institution-te tana loan guarantee  a  pek theihna tur leh tlu chhe mai tura awmte tlan chhuah nana ruahman a ni. Tun February 2024 thlenga GRF hnuaia principal-a invest tawh zat chu Cheng Vbc. 64.00 ni tawhin, tun Financial Year chhung hian he fund atang hian Cheng Vbc 24.62 chu withdraw a lo ni tawh a, Cheng Vbc. 2.70 kumin chhung vek hian invest tawh a ni  bawk a ni. Cheng Vbc. 10.80 invest belh leh tum niin, chuti chuan, kum 2023-24 tawpa balance kan neih tur chu Cheng Vbc 45.00 a ni ang. Pu Speaker, heng reserve fund pahnih kan neihte hi an pawimawh hle a, he fund siam a nih chhan kan tar lante bakah, RBI atanga Special Drawing Facility kan lak theih zat bithliah nan pawh hman an ni bawk a ni.

SAWRKAR INTHLAK LAIA KAN SUM DINHMUN

8. Pu Speaker, he Sawrkar thar hi December ni 8, 2023-a lak luh a nih lai khan kan Sawrkar sum leh pai dinhmun tlangpui chu a tha lem lo hle a. A hnuaia mi hi kan dinhmun tlangpui a ni –

9. November 30, 2023-a Revenue leh Capital head atanga kan hmuh chin chu Cheng Vbc. 6378 a nih laiin, hemi hun veka kan sum hman chhuah chu Cheng Vbc. 6925 a ni a. Hetih lai veka kan leiba tling khawm chu Cheng Vbc. 12966.93 a ni bawk. Heti zat leiba atanga Cheng Vbc. 570.00 chu April ni 1 atanga November ni 30 inkara Open Market Borrowings atanga puk a ni a, a dang Cheng Vbc. 130.44 chu NABARD, NCDC leh EAP atanga puk a ni bawk. Chutih mek lai chuan, Cheng Vbc. 213.00 chu loan hrang hrang rulhna atana hman a ni bawk. November ni 30, 2023-a RBI State Account-ah minimum balance maintain tur a awm loh avangin Ways & Means hmanga puk a ni bawk a, Ways & Means leiba (outstanding amount) chu Cheng Vbc. 109.30 a ni.

10. Kum 2023-24 chhunga Health Care Scheme atana Cheng Vbc. 60.00 ruahman atangin November ni 30 thlenga release chu Cheng Vbc. 35 a ni. Health Care Scheme changtlung leh huap zau zawka tun kuma hman theih tura duan mek a ni bawk.

11. SEDP Family Oriented atana sum ruahman Cheng Vbc. 300 atanga hman chhuah zat chu Cheng Vbc. 150.00 a ni.

12. November ni 30, 2023 thlenga Special Assistance to Sates for Capital Investment (SASCI Part-I) atana Central Sawrkar in project a rawn pawm te chu Cheng Vbc. 694 ni in, Central lam atanga release zat chu Cheng Vbc. 463 a ni a. Hemi ni thlenga State Sawrkarin implementing agencies te hnena a pek chhuah chu Cheng Vbc. 200 a ni.

13. Hemi hun lai veka Pension leh Retirement Benefit dangte State Treasury hrang hrang hnuaia pek chhuah loh la awm zat chu Cheng Vbc. 238.13 a ni.

KALPHUNG THAR – MIPUI SAWRKAR

14. Kan State hi hetianga sum leh pai dinhmun derthawng taka kan din mek avang hian, ngai awh chho leh turin “Year of Consolidation” puang lo thei lovin min siam ta a. Hetih lai hian ram chhung ei leh bar zawnna kawnga hmasawnna tur ruahmanna tihlawhtling turin “Kalphung Thar – Mipui Sawrkar” chu mipuite beiseina tihlawhtling turin a inbuatsaih mek a ni. Kan Sawrkar chu hmasawnna rualkhai leh ngelnghet siam tur te, kan chheh vela ramngaw leh nungchate humhalh chung sia reform policy hrang hrang – agriculture & allied sector ah te, healthcare lamah te, sports, tourism, land reforms, administrative reforms leh industrial reforms lamahte hma thar la turin a inbuatsaih mek a ni. Chutih laiin, kan hmelma kumhlun hlemhletna hi theih tawpa do turin kan inbuatsaih a, hemi atana hmanraw hrang hrang, social security lama hmalakna te, ram leilung humhalh te, entrepreneurship leh skill development te hi mumal taka kalpui turin kan inruahman mek bawk a ni. Entrepreneurship Development Centre, Incubation  Centre leh Start-up Hub te chu kan thalaite’n tangkai taka an hman theih turin kan sawrkar hmasa khan hma lo la in tunah hawn a ni tawh a ni.

15. Pu Speaker, kan Sawrkar chu lakluh a nih veleh khan, Ni 100 chhunga hmasawnna atana tihhlawhtlin tur, “Chief Minister’s 100 Days Programme” chu puan chhuah a ni a. Hemi bawhzui tur hian Commissioner & Secretary to Chief Minister kaihhruai monitoring committee chu din nghal a ni a, he programme hnuaia project-te chu March 31, 2024 chhunga tihhlawhtlin tum a ni.

16. Pu Speaker, heng hmasawnna tur point thenkhat kalphung tlangpui leh a tihlawhtling tura hma kan lak tawh chinte han tarlan ka duh a.

(i) Year of Consolidation

17. Kum 2024-25 hi sum leh pai inrenchemna kum, year of consolidation atan hman tum a ni a. Hetah hian fiscal deficit tihhniam leh theih tawpa kan leiba sang lutuk tihniam hi kan tum ber a ni dawn a. Chuvangin kum 2024-25 a sum puk tur kan Public Debt chu Cheng Vbc. 697.69 zetin kan tihniam dawn a ni. Chumi atan chuan a bul tan nan kan sum hmanna te thlirin tul baka kan hmanna ni a hriatte tihtawp leh tihhniam kawngah hma kan la dawn a ni. He programme avang hian State pawisa hmanga project lian tham tak tak, counterpart funding tam tak theh chhuah ngai ang chi chu he sawrkar kum chhung hi chuan kan insum rih dawn a ni.

(ii) Minimum Support Price

18. Kan Sawrkar hian thlai chi thlan bik 4, heng sawhthing, aieng, hmarcha leh hmunphiah te hi minimum support price hmanga a tul dan anga loneitute hnen atanga leisak thei turin ruahmanna a siam a, Budget ah pawh dah nghal a ni. Chutih rualin lo neitute hian a hralhna tha zawk an hmuh phawt chuan zalen takin an hralh thei dawn thung a ni. Hei hi kan rama loneitute tihhmasawnna tura kan Sawrkar programme pawimawh tak a ni.

(iii) Resource Mobilization Committee

19. Mizoram Resource Mobilization Committee (MRMC) chu ka Chairman-na hnuaiah din a ni a. A hnathawh tlangpui turte chu kan sum hman tihhniam dan kawng dap te, sawrkar revenue tihpun dan tur ngaihtuah te, Sawrkar hnuaia entity leh machinery hman tlak tawh loh tihriral (disinvestment) leh thawktute dinhmun zir chian te a ni ang.

(iv) Anti-Corruption Measures

20. Eirukna do hi Sawrkarna kan chan hma atanga mipuite hnena kan inzawrhna leh tihhlawhtlin ngei kan tum zinga mi a ni. Mizoram Sawrkar hnuaia project hna thawh reng reng chu a hun taka thawh zawh an nih theih nan mumal taka vil zui tum a ni a. He hna thawk tur hian Mizoram State Project Monitoring Committee (MSPMC) chu ka Chairman-na hnuaia din fel a ni tawh a. Tin, a hmasa ber atan kan Sawrkar chuan Central Bureau of Investigation (CBI) hnenah kan State chhunga hlemhletna awmte chhui thei turin phalna kan pe tawh nghe nghe a ni.

(v) Punctuality and Time Management

21. Biometric Attendance System hi Sawrkar Department zawng zawngah hman tum a ni a. Mizoram Secretariat chu enchhin nana hmangin, 100 Days programme pawn lamah District hrang hrangah hman chhoh zel tum a ni. Hei hi Sawrkar hnathawkte’n mumal zawka hun an vawn theih nan leh hlawk zawka hna an thawh theih nana ruahman a ni.

(vi) Agricultural Market Assurance Fund Management Board

22. Kut hnathawktute thar chhuah mumal zawk leh hlawk zawka hralh chhuah a nih theih nan, Agriculture Minister kaihhruaina hnuaiah Agricultural Market Assurance Fund Management Board din a ni. Anni hian thlai thar thlan chhuah bikte chu a man tur mumal taka bithliahin, a sawngbawl leh State chhung mai bakah State pawn lamah mumal taka sumdawnna kalpui a nih theih nan hma an la dawn a ni.

(vii) Boundary Committee

23. Mizoram leh Assam ramri-a harsatna kan tawh te zir chiana chin fel a nih theih nan Mizoram State Boundary Committee chu Home Minister kaihhruai turin din fel a ni.

(viii) Anti-intoxicating Substance Drive

24. Kan ramin harsatna namen lo kan tawh zu leh ruihhlo dona te, naupang hruaisualte siamthatna leh ruihhlo ngaite enkawlna kawngah Kohhran leh Tlawmngai pawlte bakah he lama mithiam leh thahnem ngaite nen thawkhoin, theih tawpa hmalak chhoh tum a ni a. Hemi atan hian policy leh dan tharte duangin a bul tanna atan Budget-ah pawh Cheng Nuai 50.00 dah a ni.

25. Hand Holding Policy, Bana Kaih policy kan tih, kan Sawrkar flagship programme hi kan rama kut hnathawktute tihhmasawnna tura ruahmanna a ni a, hmalakna hrang hrang, heng loneitute thlai thar thlan bik leina atan te, food processing atan te, thlai thar zawrh leh hralhna kawngah te, entrepreneurship leh skill development te, thalaite tana hnathawh tur siam chhuah leh kawhhmuh lamah te, ram chhunga industry te-nau din dan kawng kawhhmuh leh tanpuina atan te leh hmasawnna dang atan te hman a ni ang. He policy hi amah lawnga kal mai lovin, Central leh State Sawrkar hnuaia thawh mek leh Scheme lo la awm thei tur hrang hrangte nen a theih ang anga inthlun zawma, mipui vantlang thleng phak tura hlawk zawka hna thawh dan tur kawng dap zel kan tum a ni. He policy kaihhnawih department te chu an scheme leh proposal-te azirin Sawrkarin a tul angin sum a pe dawn a ni. Kum 2024-25 hi insiamrem kuma hman kan tum mek a nih avangin he policy atan hian Cheng Vbc. 200.00 chu   Budget-a dah turin ruahmanna kan siam a. Hei bakah hian kuthnathawktute hmasawnnan “Agricultural Market Assurance Fund” hnuaiah Budget RE-ah Cheng Vbc. 110.00 chu kan lo dah tawh bawk a ni.

26. Kan nunphung tihchangtlun nan leh ram hmasawnnan a pawimawh em em chu mipui sum dik taka hmana Sawrkar project te, programme te leh policy te hlawhtling taka kalpui hi a ni. Hemi atan hian kan Sawrkar chuan committee pahnih a din a, chungte chu Mizoram Project Monitoring Committee leh Mizoram State Policy Coordination Committee te an ni. Mizoram Project Monitoring Committee hian a tul a tih angin Sawrkar project kallai te chu an thawh that leh that loh te leh a hunah an zo em tih te a endik ang. Mizoram State Policy Coordination  Committee chuan department hrang hrang hnathawh dan kalhmang leh an thawh chinte endik pahin advisory body angin a awm ang a, project hrang hrangte chu a tul anga thlun zawmin, a remchan dan anga thawh dun chi a awm em tihte pawh an en bawk ang. Tin, Bana Kaih policy hnuaia project dilnate a lo enpui dawn bawk a ni.

27. Khawsak harsa zualte tana a thlawna mitthi ruang thingtlang khaw lama phurhna atan Cheng Vbc. 5.00 chu ruahman a ni a. Social Welfare Department kaihhruaina hnuaiah buaipui a ni ang.

28. Pu Speaker, Healthcare lama indaihloh phuhruk nan tun kum lo awm tur atan Cheng Vbc. 20 ka dah a, hemi bakah hian Cheng Vbc. 40 chu Healthcare bill bate rulh nan 2023-24 RE-ah dah a ni bawk a ni.

29. Pu Speaker, kan ramah hian inchhung khur enkawlna mamawh hi a lo sang ta viau mai a, mirethei zawkte tan chuan khawsak a harsa chho zel a ni. Hei hi rilrua nei chungin kan Sawrkar chuan kumin chhung hi chuan domestic electric bill hi tihsan kan tum rih lo a ni. Amaherawhchu mipui vantlang ni tin khawsakna khawih buai lo zawng siin, sawrkar tana sum lakluh theihna tur dap chhuah kan tum dawn a. Hetih rual hian kan Sawrkar chuan eng chhit man tisang si lova power supply tihpun dan tur kawng zawn kan tum bawk a ni.

30. Pu Speaker, kum lo kal turah hian power gereration leh supply mumal zawka kan kalpui theih nan Cheng Vbc. 20.13 kan dah a. Kan transformer hman mek hlui lutuk a thara thlak te, rooftop solar tangkai zawka hman dan tur te, power infrastructure tha zawk neihte chu kan hmathlir leh tum ber pakhat a ni.

31. Mipui vantlang himna hi kan ngai pawimawh a, a bikin kum upa te, hmeichhia leh pianphunga harsatna tawkte tha zawka enkawl kan tum a ni. Tun kum ruahmannaah hian National Social Assistance Programme hnuaia scheme pakhat Indira Gandhi National Old Age Pension Scheme hnuaia State contribution chu mi pakhatah Cheng za atanga Cheng sangkhatah tihpun tum niin, hei hi Budget-ah dah a ni.

32. Pu Speaker, State Finance Commission 2-na chuan a Report chu July 2023 khan a tichhuak a. An Report-in a rawt dan chuan State Own Tax atanga kan revenue lakluh atanga 42% chu vertical devolution (State Sawrkar atanga Local Bodies-a sem tur) atan hman ni se, chumi atanga 90.71% chu Autonomous District Council (ADC) pathum ten insem rawh se tih a ni a. Commission-in an recommend ang zul zui chuan kum 2024-25 chhungin ADC pathumte hnenah Cheng Vbc. 607.09 pek turin ruahman a ni. Heta tanga Cheng Vbc. 424.22 chu Share of Tax angin a kal ang a, Cheng Vbc. 182.87 chu Deficit Grants angin a kal ang. Commission duh dan angin, salary leh non- salary-a then sawm a awm lo vang a, Demand for Grants hnuaia Object Head Grants-in-Aid (General) angin pek an ni ang.

33. Tunlai khawvelah hian mipa leh hmeichhe intluk tlanna Sawrkarin a ngai pawimawh hle a, chuvangin tun tum Budget-ah hian a vawikhatna atan Gender Budget Statement pawh kan pharh tel dawn a ni.

34. Pu Speaker, kan Sawrkar thar hian a bul thum atanga zirna siam that (quality education system) hi thil pawimawh leh tihmakmawh niin a hria a, hemi ti hlawhtling tur hian Mizoram Education Reforms Committee pawh din thar a ni. Chumi bawhzuina atan chuan New Education Policy, 2020 hi Mizote nunphung mila pawl hniam atanga a sang ber thlengin hman kan tum a, hei hi kan naupangte rilru put hmang siam that dan tur (moral reforms) kawhhmuhna kawngte pawh School syllabus-ah tih tel kan tum dawn bawk a ni. Hemi tihhlawhtlinna atan a tul dan anga an thiamna hmang tangkai tura zirtirtute siksawi leh, zirna in sang zawk lamah eizawnna dap chhuah dan kawng inzirtir chu ngaihpawimawh hmasak-ah kan nei dawn a ni.

35. Pu Speaker, a hmaa ka lo sawi tawh ang khan kum thar lo thleng tur hi Year of Consolidation-a puan a nihna angin State sum atang chuan project lian tham kan khawih thei dawn lova. Chutih rual chuan thil han sawi chhuah chakawm tak mai kan nei a. Tun hnai mai khan Sawrkar laipui hnuaia Ministry of Road Transport and Highways chuan Aizawl By-pass Tunnel siamna tur Cheng Vbc. 1313.28 a rawn sanction a. He By-pass tunnel hi Km 2.5 a thui tur niin, Sairang leh Phaibawk inkar, National Highway No. 6 hrulah a thiangin a kal dawn a, chu chu approach road Km 2.1 a seiin a a thlawp bawk dawn a ni. Heng hnate hi Prime Minister’s Development Initiative for North East Region (PM-DevINE) hnuaia project NEC kal tlanga thawh tur a ni. Hei hi Central Sector Scheme anih avangin State sum cheng khat mah sen a ngai dawn lo a ni. He project hi kan khawpui Aizawl traffic jam nasa lutuk tihthawlna tur pawimawh tak a nih piah lamah, mihring leh bungraw chet velna atana kawng pawimawh tak a ni dawn bawk a ni.

36. Kan Budget-ah hian kan State in contribution kan neih tlemzia leh sum lakluhna atana ngaihtuahna sen a ngaihzia kan hria a, chuvangin kan Sawrkar chuan hemi kawnga hmalakna pawimawh taka tan Stamp Duty hnuaia kan rate hman lai ram hlutna (Market value of property) atanga chhutin 1% atangin 3% ah kan tisang dawn a, Cabinet pawhin hei hi kan pass diam tawh a ni. Chutih laiin hmeithai leh hmeichhe harsa zawk te tan Stamp Duty hi 3% ni lovin 2.5% ah dah a ni.

37. Kan State chhunga kawngpui kan neihte thawm that hi ei leh bar zawnna atan te, mipui himna leh hmasawnna kawng hrang hrang atan a tulzia kan hria a, chuvangin ram chhunga inkalpawhna kawngpui leh leidawh tha lote thawm that nan kum 2024-25 chhunga hman turin Cheng Vbc. 100.00 dah a ni. Hei bakah kawng chhe siamna turin Road Fund Board-ah Cheng Vbc. 40.00 dah a ni bawk.

I. BUDGET ESTIMATES 2024-25

RECEIPTS

REVENUE  RECEIPT

38. Revenue Receipt han tih hian State’s Own Tax Revenue te, State’s Own Non- Tax Revenue te, Share of Central Taxes te, CSS Grant te, Finance Commission Grant te, Central Sawrkar atanga transfer leh contribution te a huam a. Kum 2024-25 chhunga Revenue Receipt atanga hmuh kan beisei chu Cheng Vbc. 12386.49 a ni a, kum 2023-24 BE Cheng Vbc. 11486.63 aiin 7.83%-a pung tura ruahman a ni.

(i) State’s Own Tax Revenue

39. State’s Own Tax hnuaia sum kan hmuhna lian tham ber chu GST niin, State’s Own Tax Revenue Receipt atanga 79.62% a tling a ni. Sum hmuhna lian tham zual dang te chu vehicle tax te, stamp leh registration te, VAT leh profession tax te an ni. Tichuan, State Own Tax atang hian kum 2024-25 chhungin Cheng Vbc. 1312.42 hmuh kan beisei a, kum kal meka kan budget Cheng Vbc. 1084.30 atangin 21%-in a pung dawn a ni.

(ii) State’s Own Non-Tax Revenue

40. State’s Own Non-Tax Revenue hnuaia kan sum hmuhna tlangpui chu Investment on cash balance te, interest receipt te, utility charge te, civil aviation te, power & water charge te, State lottery te, mining activities leh a dangte a ni. Heng atanga kum lo kal tura hmuh kan beisei chu Cheng Vbc. 1122.39 a ni a, kum kal meka estimate aiin 25% in a pung a ni.

(iii) Devolution of Central Taxes & Duties

41. Fifteenth Finance Commission of India chuan Sawrkar laipuiin chhiah hrang hrang a hmuh atanga 41% chu State hrang hrangte insem turin a recommend a, heta tanga Mizoram chan tur chu 0.5% a ni. Kum kal mekah hian kan Budget BE chu Cheng Vbc. 5107.25 a ni a. RE ah 8.13% a rawn pungin Cheng Vbc. 5522.48 a kai chho va. Kum 2024-25 Budget Estimate chu Cheng Vbc. 6098.93 Central Budget-a a lan danin a ni a, 2023-24 RE aiin 10.44% in a la sang a ni.

(iv) Finance Commission Grants

a. Post Devolution Revenue Deficit Grant

42. State Sawrkarin zalen zawka sum kan hman theih thin kha a tlahniam zawnga revenue deficit grant kan dawn tak zel avangin harsatna kan tawk chho hret hret a. Kum 2023-24-a Cheng Vbc. 1474.00 kan dawn kha, 2024-25 ah chuan Cheng Vbc. 1079.00 chauh kan dawng dawn ta a. XV Finance Commission recommendation ang chuan 2025-26 ah phei chuan Cheng Vbc. 586.00 chauh kan dawng tawh ang.

b. Local Body Grants

43. Kum 2024-25 chhunga Urban Local Body (ULB) Grant kan beisei chu Cheng Vbc. 39.00 niin kum kal meka kan dawn hi Cheng Vbc. 37.00 a ni. Rural Local Body (RLB) Grant hi Cheng Vbc. 76.00 kan beisei a, kum kal meka kan dawn tura ruahman Cheng Vbc. 72 aiin 5.56%-a pung tura beisei a ni.

c. State Disaster Risk Management Fund

44. State Disaster Respond Fund (SDRF) leh State Disaster Mitigation Fund (SDMF) te hi chhiatrupna lo thlen thulha harsatna phuhrukna tur sumte an ni a. SDRF hi Central atanga fund lo kal niin 90% an tum a, State in 10% kan tum ve thung a. Hemi atan hian Cheng Vbc. 54.00 dah a ni, 2023-24 khan Cheng Vbc. 52.00 dah a ni thung.

(v) Grants for Centrally Sponsored Schemes (CSS) and other contributions

45. CSS fund te hi State Sawrkarin ram hmasawnna hna kan thawh theihna pawimawh tak an ni a. Tunah hian Mizoram chuan Department hrang hrangah Scheme 50 chuang zet kan kalpui a ni. Heng Scheme zinga a langsar zualte chu Samagra Shiksha, MGNREGS, PMAY, NHM, NSAP, Jal Jeevan Mission leh a dangte an ni a. Heng CSS leh contribution dang atangte hian Cheng Vbc. 2478.07 kan beisei a ni. Kum 2023-24 BE Cheng Vbc. 2580.86 aiin 4.15% -in kan beisei hniam thung a ni.

(vi) Externally Aided Projects (EAP)

46. Kum 2024-25 chhungin Externally Aided Projects atangin grant anga kan dawn chu Cheng Vbc. 90.00 hmuh kan inbeisei a. Chung kan hmuhna tur tlangpuite chu – Health & Family Wefare Department hnuaiah “Mizoram Health System Strengthening Project” leh Agriculture Department hnuaiah “FOCUS Project” te leh Urban Development and Poverty Alleviation Department (UD&PA) hnuaiah “Sustainable Urban Project” atang tein an ni. Tun kum kal laia EAP grant hnuai atanga kan hmuh let tawh zat chu Cheng Vbc. 49.17 a ni.

CAPITAL RECEIPT

47. Pu Speaker, kan hriat tlan theuh angin Capital receipt hi kawng hrang hranga hmasawnna hna thawhna tura sum hmuh hi an ni ber a. Hei hian internal debt leh Central Sawrkar leh financial institution atanga loan kan lak te bakah, Sawrkar hnathawkte’n an loan lak an rulhna pawh chhiar tel a ni. Capital receipt atanga hmuh kan beisei zawng zawng chu Cheng Vbc. 2025.63 a ni a, Cheng Vbc. 697.69-in kum kal mek BE Cheng Vbc. 2723.32 aia tlem zawk tura ruahman a ni.

(i) Recovery of Loans and Advances

48. State Sawrkar hian mamawhna hrang hrang, housing loan te, cooperation ah te, sawrkar hnathawk loan dangte a pe chhuak ve thin a, hemi atan hian Cheng Vbc. 33.60 chu kum 2024-25 chhungin hmuh let beisei a ni.

(ii) Public Debt

a. Internal Debt

49. Internal Debt han tih hian loan hrang hrang RBI atanga kan puk te, Market Loan te, NABARD Loan te, NCDC leh institution dang REC, UIDF leh SIDBI atanga kan hmuh turte pawh a huam a ni. Internal Debt atanga kum 2024-25 chhunga hmuh tura chhut chu Cheng Vbc. 1482.03 a ni a, kum kal mek 2023- 24 ah Cheng Vbc. 2479.00 aiin Cheng Vbc. 996.97-in a hniam zawk a ni. Kan internal debt tlak hniam viau na chhan hi kum 2023-24 budget-a Ways & Means Advance Cheng Vbc. 1000 dah a ni a, tun kumah Cheng nuai thum chauh dah tak vang a ni ber. Kuminah hian Market Loan atangin Cheng Vbc. 1170.00, NABARD atangin Cheng Vbc. 250.00, NCDC atangin  Cheng Vbc. 5.00, REC atangin Cheng Vbc. 2.00, SIDBI atangin Cheng Vbc.  30.00, leh UIDF atangin Cheng Vbc. 25.00 te lak kan tum a ni.

b. Loans & Advances from the Centre and other entities

50. Kuminah hian kum kal meka Scheme pawimawh tak mai, kum 50 hnua Interest awm lova rulh tur, “Special Assistance to States for Capital Investment” (SASCI) chu Central Sawrkarin ram pum atana Cheng Vbc. Nuai Khat leh Singthum a ruahman atangin Cheng Vbc. 500.00 zet chu ram tana hmasawnna ro tling tur siam nan kan la leh thei dawn a. Block Loans Cheng Vbc. 10.00 kan lak tum nen a vaiin kum 2024-25 chhunga Central Sawrkar atanga kan loan beisei chu Cheng Vbc. 510.00 zet a tling dawn a ni. Cheng Vbc. 299.28- in kum kal mek BE-a ruahmanna Cheng Vbc. 210.72 aiin pung tura beisei a ni a. A punna a san chhan ber chu SASCI atanga kan hmuh tur san vang hi a ni.

DISBURSEMENTS

REVENUE EXPENDITURE

51. Kum 2024-25 chhunga kan Revenue Expenditure hnuaia sum hman tur ruahman chu Cheng Vbc. 11957.04. a ni. Hei hi kum kal mek BE Cheng Vbc. 11200.76 aiin 6.75%-in a sang zawk a, tin, kan Budget pum pui atanga 82.97% a tling bawk a ni. Kum 2024-25 -a kan Revenue Expenditure kum kal mek aia a san hret na chhan tur tlangpuite chu heng, salary leh pension atana sum sen belh a ngaih vang te, establishment cost a san zel vang te, kawlphetha (power) leina leh tui pump-na bill sang chho zel te, buhfai leina san hret zel te leh private sikul thenkhatte dinhmun tha zawka hlankai a nih avangte an ni hlawm a ni.

CAPITAL EXPENDITURE

52. Pu Speaker, sum leh paia kan dinhmunte thlirin, Sawrkar revenue tihsan te, fimkhur leh duhtui taka sawrkar sum enkawl te, chutih lai meka hmasawnna hna thawhna tur Capital Expenditure a tam thei ang ber dah te hi Sawrkar tan chuan chona lian tak, kan tihmakmawh si a ni.

53. Tun financial year tharah hian Capital Expenditure atana sum kan ruahman zawng zawng chu Cheng Vbc. 2455.08 a ni a, Budget pum pui atanga 17.03% a ni. Kum 2023-24 ah Cheng Vbc. 3141.19 a ni thung. Capital Expenditure atana allocation kan siam theih zat hi revenue surplus kan neih tam theih danah a innghat a. Capital Expenditure chu thil siam chhuah tihpun theihna tur chi leh employment generate nan te, fixed asset leh infrastructure siamna atan te, leiba tihkiamna atan te, investment siamna atan tea hman an ni tlangpui. Tun dinhmunah hian kan State Sawrkar hian inenkawlna sum hman ngei ngeina tur a ngah avangin revenue receipt atang ringawt chuan a inenkawl zo lo va, Capital Expenditure atana sum dah tur chuan loan-ah a innghat lo thei lo a ni. Engpawh nise kan Sawrkar chhung chuan a tam thei ang ber hmasawnna hna thawh nan ruahman chhoh kan tum dawn a ni.

ALLOCATION FOR DEVELOPMENT AND NON-DEVELOPMENT EXPENDITURE

A. Development Expenditure

54. Development Expenditure chuan Social Services Sector   leh   Economic Services Sector kan tihte a huam a. Heng sector-te  hian mipui vantlang khawsak phung leh eibar zawnna kawnga hmasawnna tur ngaihtuah a tum ber a ni. Chumi atan chuan Cheng Vbc. 8247.05 ruahman a ni a, chu chu Budget pum pui atangin 57.22% a ni. Kum kal mek BE Cheng Vbc. 7382.90 aiin 11.70%-a pung tura ruahman a ni.

55. Social Services Sector chuan Education, Sports, Health & Family Welfare, Water Supply & Sanitation, Housing, Local Administration leh District Council te, Labour & Employment, Social Welfare & Nutrition,  Information & Broadcasting te a huam a. He sector atan hian Cheng Vbc. 4967.09 (revenue portion atangin Cheng Vbc. 4581.09 leh capital portion atangin Cheng Vbc. 386.00) ruahman a ni a, hei hi Budget pum pui atangin 34.46% a ni. Kum kal mek BE Cheng Vbc. 4544.60 aiin 9.30%-a pung tura ruahman a ni.

56. Economic Services Sector chuan Agriculture & allied activities, Rural Development, MLA Fund, Power, Irrigation and Flood Control, Industries and Mineral, Civil Aviation, Road Transport, Communication, Science & Technology, Environment, Tourism, Civil Supplies, etc., te a huam a. He sector atan hian Cheng Vbc. 3279.96 (revenue section atangin Cheng Vbc. 2931.91 leh capital section atangin Cheng Vbc. 348.05) dah a ni a, tichuan Budget pum pui atanga chhutin 22.76% a ni. Kum kal mek BE Cheng Vbc. 2838.30 aiin 15.56%-a pung tura ruahman a ni.

B. Non-Development Expenditure

57. Non-Development Expenditure chuan General Services Sector hnuaia sum hmante a huam a. Chu chuan State Sawrkar hnuaia a relbawltu department pawimawh tak tak, Legislature te, General Administration te, Election te, Adminstrative Services leh a hnuaia Public Service Commission te, District Administration te, Police te, Mizoram Lokayukta te, Treasury & Accounts te, Fiscal Services, Interest Payment & Debt Servicing, Pensions & Other Retirement Benefits te a huam hlawm a ni. General Services Sector hnuaia sum hmante hi Non-Developmental Expenditure hnuaia dah an ni na a, he sector hnuaia activities tam tak hi ram hmasawnna atan an pawimawh em em tho a ni. General Services Sector atan hian Cheng Vbc. 5663.74 (revenue section atangin Cheng Vbc. 4444.04 leh capital section atangin Cheng Vbc. 1219.70) dah a ni a. Hei hi Budget pumpui atangin 39.30% a ni. Kum kal mek BE Cheng Vbc. 5514.54 aiin 2.71%-a pung tura ruahman a ni.

58. Heng category-a tel ve lo, Public Debt leh Loans & Advances te a la awm a, hetah hian Cheng Vbc. 501.33 dah a ni bawk a, chu chu Budget pum pui atangin 3.48% a ni. Kum 2023-24 BE Cheng Vbc. 1444.51 aiin 65.29%-in tlahniam tura ruahman a ni.

II. CHARGED AND VOTED EXPENDITURE

59. Kum 2024-25 chhunga sum hman tura chhawp chhuah zawng zawng, Gross Estimated Expenditure chu Cheng Vbc. 14412.12 a ni a, kum kal mek BE aiin 0.49%-in a pung hret a ni. Heta tang hian Food, Civil Supplies & Consumer Affairs Department (FCS&CA) te, Public Works Department (PWD) te leh Printing & Stationery Department hnuaia buhfai te, kawng siamna hmanrua te leh stationery leina atang tea kan hmuh let tur (deduct recoveries) Cheng Vbc. 135.50 kan paih chhuah tawh hnuah Net Estimated Expenditure chu Cheng Vbc. 14276.62 a ni.

60. Gross Estimated Expenditure atang hian Charged Expenditure chu Cheng Vbc. 1235.27 a ni a, kum kal mek BE aiin 44.58%-in a tlahniam a. Voted Expenditure-ah thung chuan kum kal mek BE atangin 8.78%-a pungin Cheng Vbc. 13176.85 a ni ang a, he House zahawm tak pawmpui turin ka rawn pharh a ni.

III. SUPPLEMENTARY DEMAND FOR GRANTS

61. Pu Speaker, Supplementary Demand for Grants atan Cheng Vbc. 3294.16 hi Revised Estimate hnuaiah dah a ni a. Tin, kan Budget Estimate mai bakah, kum kal lai 2023-24 Budget Estimate piah lama State Sawrkar-in policy leh programme tihhlawhtlin nana Department hrang hranga sum indaihlohna ka han pharh duh bawk a. Chung sum hmanna thenkhat liantham deuhte han tarlang ila – CSS ah Cheng Vbc. 716.23, SASCI hnuaiah Cheng Vbc. 681.78, NABARD ah Cheng Vbc. 254.06, EAP hnuaiah Cheng Vbc. 30.14, State Matching Share ah Cheng Vbc. 237.82 niin SEDP fund Cheng Vbc. 300.30 atang hian Cheng Vbc. 110 chu Agriculture Market Assurance Fund atan dah a ni a, tin Cheng Vbc. 40 chu Mizoram State Health Care Society ah health care bill bate rulh nan dah a ni bawk. Hengte hi Supplementary Demand-ah lo lang mah se, Budget Session 2023-a lo pass tawh, a hmanna head siamremna mai a ni. Heng bakah hian Cheng Vbc. 67.28 chu Autonomous District Council pathumte inrelbawl nan pek belh an ni a, MLA election tan khan Cheng Vbc. 96.11 hman tawh a ni bawk.

62. Tichuan kum 2023-24 Budget Estimate pawna allocation kan pek belh zawng zawng chu Cheng Vbc. 3294.16 a ni a. Hemi atanga Cheng Vbc. 6.23 chu Charged Expenditure a ni a, Cheng Vbc. 3287.93 hi Voted Expenditure niin he House zahawm tak pawmpui turin ka rawn pharh a ni.

63. Pu Speaker, Political Party te hi ngaihdan inan lohna avanga thu inchuh chang awm thin mah sela, kan State hmasawnna leh dam khawchhuahna atan hi chuan party politics bansanin kan tanrual a tul tak meuh a. Budget hi figure ni mai lovin kan State tana hmasawnna rahbi thar leh kan ke penna kaihruaitu anih ngei beiseiin, kum 2024-25 Budget Estimate (Charged Expenditure tel lovin) Cheng Vbc. 13176.85 leh kum 2023-24 Supplementary Demand (Voted Expenditure) Cheng Vbc. 3287.93 chu he House zahawm taka sawi ho atan leh min pawmpui turin ka rawn pharh e.