CHIBAI.

Mizoram State Day puala in duhsakna chibai ka buk a che u. Kum 1986 June 30 khan Central sorkar leh Mizo National Front inkara inremna thuthlung (memorandum of settlement), Mizoram Peace Accord tia hriat bawk chu ziah a ni a. Hemi ni atang hian Mizoram chu State puitlingah hlankai kan ni. He remna thuthlung pawimawh tak hian kum 20 chuang rambuai chu a rawn ti tawp a, kum 1987 February 20 khan Mizoram chuan  state puitling angin kawng engkimah bul a tan ta a ni. Peace Accord avang hian Mizoram chu Central Sawrkarin State min pe tih hi kan hriat a pawimawh hle a. Tin, Mizoram pawh hian kan intiamna te rinawm taka vawng tlatin kum 37 chhung chu state ralmuang ber kan ni mek a ni.

Sawrkar laipuiin kan ram hmasawnna atan Scheme leh Programme hrang hrang a siam a, Ek Bharat Shreshtha Bharat pawh chutiang programme pakhat a ni. He programme hian state hrang hranga chengte kan inhriatchian theih na turin program tha tak tak a siam a, India ram cheng hnam hrang hrang te kan lo inpawh zawk a, kan inhriat chian tawn leh kan inlaichinna te a lo ngheh zual zel  chu a thil tum pawimawh ber a ni. Ram chhung hmun hrang hrang atanga lo kal India mi kan nih angin nunphung leh khawsak dan hrang hrang kan nei a. Heng kan ziarang leh khawsak phung danglamna te hian min thenhrang tur a ni loa, India khua leh tui te chu  mi chi hrang hrang, tihdan phung leh khawsak phung danglam tak nei theuh kan ni tih min hriatchian tir zawk se a tha ang. Chuvangin, Ek Bharat Shreshtha Bharat in a thil tum ang hian  Mizoram mipui zawng zawngte chu kan khaw hawi ti zau a, midangte khawsak phung te hriatthiamsak tum turin kan in  chah a. Hei hi kan hnam ziarang hloh lovin tih theih a ni. Mizorama  kan hnam ziarang te hloh chuang lovin kan va awmna state a chengte nundan leh tihdan phungte pawh hrethiam a zah sak chunga kan khawsak thiam a ngai a.  Kan nundan leh hawiher te hi India rama State ralmuang bera cheng tih atan mawi a ni tur a ni.

Mizoram State Day pualin duihsakna sang ber ka hlan nawn leh a che u.

Jai Hind.