No.2455/2021-2022

Aizawl, the 2nd October 2021: Vawiin chawhnu khan Governor Brig B.D. Mishra (Retd) chuan Mahatma Gandhi piancham vawi 152-na pualin kuttah puan tahtute Raj Bhavan-ah a kawm.

Governor Brig B.D. Mishra (Retd) chuan India Hnampa piancham vawi 152-na tha taka kan hmang leh thei chu lawmawm a tih thu a sawi a. India Hnampa pianchamah hian amahin ramdang rahbeha kan awm reng loh nan intodelh a pawimawh hmasa ber tih a zirtir thin a. Intodelhna tur kawng hrang hrang te duangin Puantah hmangin bul tan a ni a ti a. Kum tam a liam hnuah Prime Minister Narendra Modi chuan Pu Gandhi-a ngaihdan rawn tawmpuiin India ram intodelhna tura nasa taka tan lak - Aatma Nirbhar Bharat chu nasa takin a rawn kalpui ta a ni a ni a ti.

Intodelh tur chuan mimal tin ten kan tih theih ang tawk theuh ti chunga thawhchhuah neih a ngai. Kuttah puan tahtute pawhin an thawhrimna avangin khawl nei hranpa lovin puan an tah a, sum an thawk chhuak a; heng hmalakna te hi lian tham lo angin lang mahse Aatma Nirbhar Bharat puitlin nan a pawimawh vek a, Pu Gandhi-a hmathlir tihhlawhtlina kawng pakhat a ni a ti.

Governor leh Lady Governor Neelam Misra te chuan puantahtute chu an eizawnna chhunzawm zel tura chahin an themthiamna te pawh an tu leh fate hlan chhawng zel turin an chah a. Hmarchhak state a hmeichhiate an themthiam hlein an hmu tih sawiin an kutchhuak nalh tak tak te chu hmun tinah man man takin hralh a tla chhunzawm zel dawn a ni an ti. Puantahtute hnenah hian Lady Governor chuan la duang engemaw zah a pe bawk a ni.