4022/2023-2024

Aizawl, 1st March 2024: Nimin tlai khan RB Mc Cabe Hall, Aijal Club-ah Association of Surgeons of Mizoram chuan   khawmpui (annual conference) an nei a. He hun hi Governor Dr Hari Babu Kambhampati chuan Khuallian niin a hmanpui.

Governor Dr Hari Babu Kambhampati chuan Damlo zai ngai zaitu bik Doctor (Surgeon) te khawmpuiah a tel thei chu lawmawm a tih thu a sawi a. Surgeon te thawhrim na leh an thil tawn tam taka tang hian damlo te enkawlna tha zawk thiamna thar tam tak a lo chhuak tawh a. Damlo enkawlna leh Natna zirchianna kawngah Surgeon ten an thawh hlawk hle a ni a ti.

Governor chuan Surgeon te hna chu hna pawimawh tak, mipui tena kan mamawh a nih rualin, hna khirh leh fimkhur ngai tak a ni a. He hna hi tihfuh loh palh chang a thleng ve zeuh thin bawk a. Hengah te hian Surgeon ten mipui dem an hlawhin an hna thawh that te a hliah khuh thei thin tih a sawi a. Theih tawp chhuah a, an finna leh  thiamna te damlo enkawl damna atana hmang tu doctor te hi mipui ten kan zah thiam a, an rawngbawlna hlu tak te hi ka hlut thiam a ngai a ti. Doctor te pawh sawiselna a lo awm pawhin zam mai lovin, tihdam rawngbawlna thawktu, hna zahawm bik thawk tu an nih angin that akin an hna te, uluk leh zuala an thawh  a ngai a ti. Governor chuan Zoram hmun chengker leh kilkhawra tihdam rawngbawl hna thawktute hian mipui lam atanga thlawpna leh an hnathawh hlutsak an phu a ni a ti.

He hunah hian Governor chuan nikum lama ZMC a Surgeon te hlawhtlinna ropui tak a sawi lang a.  “Dr John Lalliandinga kaihhruai medical team-in Zoram Medical College-a conjoined twins hlawhtling taka an zai kha thil ropui  tak a ni a. ASM chhungkua te he hlawhtlinnaah hian ka lawmpui a, ka chhuang a ni”, a ti.

Governor Chuan NHM hnuaia Central sawrkarin kan lo hrisel zawkna tur leh hma kan lo sawn deuh deuh na turin hmalakna pawimawh tak tak a nei a. Hemi tihhlawhtlin kawngah hian Doctor te inpekna leh thawhrimna chu thil pawimawh ber zinga mi a ni tiin Doctor te chu tan la sauh sauh turin a fuih bawk.

Full Speech of Governor: https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-annual-conference-of-association-of-surgeons-of-mizoram-at-aijal-club-aizawl-on-29th-february-2024

ASM Conference hi Dr Saia Chenkual, President, ASM-chuan President thuchah sawiin tan a ni a. Hemi hnu hian  Dr Lalrinsiama, Secretary ASM chuan ASM in kum khat chhunga an hmalaknaah report a pe a. Dr R.Tlangkunga Oration segment-ah Dr Om Tantia chuan “ Minimal Access Surgery : Lessons learnt in a journey of 3 decades”tih thupui hmangin zirtirna a pe a. Dr John Lalliandinga, Ass Secretary, ASM chuan lawmthu sawiin huntawp a khar thung.