4021/2023-2024

Aizawl, the 1st March, 2024: Nimin khan Rajya Sabha MP Pu K.Vanlalvena chuan  Mizoram chhim tawp leh Bay of Bengal inkal pawhna tur kawngpui sial mek KMMTTP road chu a hmunah kalin a tlawh.

Pu K.Vanlalvena leh a team te hi Zorinpui Assam Rifles Camp ah an lut hmasa a. Chhunah  Myanmar ram chhunga Arakan Army Camp ah hun an hman hnuah  KMTTP kawngpui an endik Contractor te nen an en ho thung.

Zorinpui atanga Paletwa inkar kawngpui sial mek chu ramri atanga  Myanmar ram chhung km 8 a thui Pu K.Vanlalvena te hian an tlawh a. He kawng laih mek hna thawktu IRCON Company Deputy Manager leh an hnuaia hna thawk tu Myanmar sub- contractor te nen  inkawmin kawng laih hna hi beisei aia a muan thu leh chak thei ang bera thawh a tul thu Pu K.Vanlalvena hian a sawi pui bakah Arakan Army hotute hnenah pawh he kawng laih mek hi zawh a nih hunah chuan kan zavaia chhawr tangkai tur a nih avangin hnathawktute lo tawiawm turin a ngen nghal bawk a.

Contractor te pawhin tun atang chuan chak taka hna thawh a nih tawh tur thu Rajya Sabha MP hnenah hian an lo thlen a.Arakan Army hotute pawhin kawng siam tute tana harsatna an siam dawn loh bakah a tul dan a zir zelin venhimna an pek zawk tur thu Rajya Sabha MP  hi an hrilh bawk a ni.

Ministry of External Affairs Govt of India hnuai a hna thawh mek KMMTTP Road project hi  chi li ah  then theih  a ni a.Pakhatna chu Chhimtuipui lui chhuah Tuifinriat kama lawng chawlh hmun khua Sittwe Sea port siam that hna a ni a,chu chu thawh zawh tawh niin nikum May thlaah Union Minister Pu Sarbananda Sonowal an a hawng tawh a.A pahnihna chu Sittwe leh Paletwa inkar Chhimtuipui lui dung KM 158 a thui  lawng zawh theih tura siam hna a ni a,hei pawh hi thawh zawh tawh a ni a.A pathumna chu Paletwa leh Zorinpui inkar KM 106 a thui motor kawngpui laih hna a ni thung.

He kawngpui laih hna bik hi a muan a, a theih  anga chak a nawr hman hmawh a tul tih Rajya Sabha MP chuan a sawi a ni.

A palina chu Mizoram chhung Lawngtlai to Zorinpui KM 94 a thui niin hei hi thawh zawh khat tawh a ni thung a.Amaherawh chu kawng laih zawh tawh hmun engemaw zatah lei vung tawlhin harsatna a la siam thung a ni.

Rajya Sabha MP  hi LADC  a EM pahnih Pu Rongura leh Pu Apetaw Lallawmsanga te bakah Central YLA hruaituten an tawiawm a ni.