4023/2023-2024

Serchhip the 1st March, 2024 : Chapchar Kut 2024 chu Serchhip Sports Complex-ah ropui taka hman a ni a, Agriculture Minister Pu PC Vanlalruata, Tuikum bialtu MLA chu Kut Pa a ni a. Serchhip Bawrhsap Pu David Lalthantluanga chu Kut Thlengtu a ni.

Kut Pa Pu PC Vanlalruata chuan Chapchar Kut, Mizo te kut ropui ber hmangtute chibai bukin duhsakna a hlan a. Pi pu chena kan hnam rohlui Zonunzemawi a nun reng theih nan Chapchar Kut kan hmang thin tih sawiin he zonunmawi hi kan nunah a bet reng tur a ni, a ti.  Hmanlai chuan he Kut hi zu leh sa nen an hmang thin a, Kristian kan nih hnuah chuan zu leh ruihhlo tel loin hlim takin kan lawm thin a ni, Minister chuan a ti a. Kan hnam luhchilh a, kan thalaite runtu ruihtheihthil laka fihlim turin mipuite a chah a. Kalphung thar sawrkar chuan ruihtheihthil, mipat hmeichhiat hmansualna leh eirukna laka fihlim sawrkar leh society siam a tum a ni, a ti. Agriculture changtu Minister chuan mipuite kan intodelh theih nan kuthnathawkte hmasawnna atan sawrkarin tan a la dawn tih a sawi a. Intodelhna lamtluang zawh tur leh hmalam pan tura an rilru te siam thar turin mipui a sawm a. Hnam dangte tan pawh a entawntlak, Mizo hnam ropuia siam turin Chapchar Kut hmangtu zawng zawng te a chah a ni.

Kut Thlengtu Serchhip DC Pu David Lalthantluanga chuan thuhma sawiin, Pathianin kan hnam ro hlu kan chhawm nun zel theih nana min pek, Chapchar Kut ropui taka kan hmang thei kan vanneihzia a sawi a. Kan pi leh pu ten he Kut hi inremna ni leh induhsakna ni atan an lo hman thin angin, keini pawhin induhsak tawnna nen, hlim leh phur taka he ni hi hmang turin DC chuan mipuite a chah a. Zonunzemawi - aia upa zaithiamna, tlawmngaihna, rinawmna, taimakna, dikna leh huaisenna kan vawn nun leh kan chawisanna ni atan i hmang ang u, tiin kalkhawmte a sawm a ni.

Kut lawmnaah hian zai leh Mizo hnam lam hmuhnawm tak tak chi hrang hrangte entir a nih bakah hlado chham, costume parade, pawnto leh a huhoa mipui chai te a hun hman ni bawk a. Cheraw kanpui neih niin Serchhip khawpui chhunga YMA branch sawmpanga (15) ten he lam hi an entir a.  Chapchar Kut chhimtu zing atangin Chapchar Kut Miss thlan chhuah a ni bawk.

Chapchar Kut lawmna programme hi Serchhip Sub-Headquarters YMA President Pu Kawlthuama’n a kaihruai a. Branch YMA, YMA chhang, MHIP leh MUP ten item hrang hrang hmuhnawm tak tak an entir a ni.