413/2023-2024

Hnahthial, the 11th May 2023: Governor Dr. Hari Babu Kambhampati leh Lady Governor Dr.Jayashree Kambhampati te chuan vawiin khan Hnahthial District an tlawh.

Governor hian Hnahthial Khawpui a luh hmain Tuipui D khua a tlawh hmasa a. Hetah hian khawtlang hruaitute in Governor an lo hmuak a. He hunah hian, Pu R.Lalremsanga, Deputy Commissioner, Hnahthial District, Pu Vineet Kumar, Superintendent of Police leh official thenkhat ten Governor an tawiawm a ni.

Governor hian Tuipui D ah hian Project Pushpak ten hun rei vak loa an thawh tan tur, Lei (bridge) dawh hna chungchangah Pu SP Kolipey, Chief Engineer, BRO, Project Pushpak Mizoram leh a thawhpui te thil a zawt fiah a. Chief Engineer, BRO chuan Lei dawh tur chungchangah thil tul hmasa te tihfel a ni tawh a, hna thawh tan theih thuai an in beisei tih a sawi. Tuipui D hmuna Chhimtuipui Lui Kan na tur hian tunah Bailey Bridge a awm mek a; tonne 4 aia rit a dawl zawh loh avangin Lirthei te nau (LMV chin) chiah kal phal a ni a. Lirthei lian deuh hret MMV ang chu Mar Boat in a phur kai thin a ni. Pushpak Chief Engineer chuan Tuipui D khua Kolodyne Bridge chu Mizoram chhim chhak lam hmasawnna atan a pawimawh em avangin theih tawp chhuahin kum 2 chhunga zawh an tum thu a sawi a ni.

Chawhnu khan Governor chuan Hnahthial Khawpui a lut a. PWD Inspection Bungalow-ah Governor leh a nupui pual hian inlawmna hun Pu R.Lalremsanga, Deputy Commissioner, Hnahthial District chuan a buatsaih a. He hunah hian Head of Department te nena inhmelhriatna hun leh cultural program tawi buatsaih a ni.

Reception program neih zawhah KVK Lunglei Complex, Hnahthial a pan a. KVK Office kawtah hian Horticulture, Agriculture, Sericulture, and AH&Vety, KVK leh MzSRLM ten dawrte an hawn te a endik hmasa a. Hemi hnu hian Conference Hall, KVK Lunglei, Hnahthialah Governor puala official program chu hman a ni. He hunah hian Governor Dr Hari Babu Kambhampati chuan District Office a hotulu te, Bank hnathawk te, MUDRA loan bank latute, Kohhran hruaitute, Political Party hruaitute leh Tlawmngai pawl te a kawm a ni.

Hnahthial Bawrhsapin District Profile a tlangzarh chhung hian Governor Dr Hari Babu Kambhampati chuan Department hmalakna chungchangah a hriatchian duh te Concerned Official te a zawt a. Tanlak ngai lai deuh nia a hriat te pawh sawi nghalin, mipui tana a ngaihpawimawh zual deuh te a sawi bawk a ni. Governor chuan scheme thenkhat chu thawh tanna rei tawh tak, tawp hnai tawh a ni a, duhaiin hengah te hian hna a muanchan avangin installment la hmuh loh te hmuh zawh thuai tuma hmanhmawh a ngai a ti.

Project thawh hun chhung tih khawmuan avang hian project thar kan thawh theih te kan thawk hman thin lo, mipuiin hamthatna an chan tur te kan dan sak tihna a ni a. Hei hi a tha lo hle a ni a ti.

Governor chuan Central Sawrkar atanga hmuh theih Social Security Scheme tha tak tak mi tam takin kan la hriat tawk loh a awm tih a sawi a. Mizoram mipui te hian heng insurance scheme tha tak tak pawisa tlem te kum khat atana pek a, vanduaina tawh thulha cheng nuai tel lai lakna tur te hi hre chiangse an zawm a rin thu a sawi a. Tunhnaiah accident a tam ta hle chu pawi a tih thu sawiin a pawi leh zualna chu heng vanduaina tawk zinga a tam zawk te hian heng social security scheme hi an lo zawm lo hi a ni a ti. Heng Scheme hrang hrang chungchang, kuthnathawktu te mamawh Loan awm thei chungchangah Bank a sum enkawl chungchangah Bank hnathawkte chu tan la sauh sauh turin a chah bawk a ni.

Governor chuan a thil ngaih pawimawh pakhat Power siam chungchangah P&E leh ZEDA te tanpuina la chungin thingtlanga cheng ten Nizung chakna hmanga Kawlphetha siam chhuah an uar a ngai tih a sawi a. Hei hian Kawlphetha kan indaih loh avanga harsatna kan tawh thin te pawh, enge maw chen chu a chhawk zangkhai dawn a ni a ti.

Official Program-ah hian Session hmasa berah Sawrkar Official te leh Bank hnathawk te nena inkawmna hun neih a ni a. He hunah hian Pu R.Lalremsanga, Deputy Commissioner, Hnahthial District hnen atangin District Profile tih thupui hmangin Hnahthial District a hmasawnna hnathawh kalpui langsar deuh te a tarlang a. Bawrhsapin presentation a pekah Rural Development, UD&PA, P&E, PHE, PWD, Agri & Allied departments, etc., huanga hmalakna pawimawh deuh te thlirho a ni. Pu Vineet Kumar, SP, Hnahthial District pawhin Hnahthial District a venhimna, dan leh thupek kenkawh chungchanga hmalakna thenkhat a tarlang thung a. Pu Lalvenhima, Addl. DC, Hnahthial District chuan lawmthu sawiin huntawp a khar thung a ni.

Hnahthial District zau zawng hi 1030 sq.km a ni a, a chhungah hian mipui 28,468( 2011 census) an cheng mek a ni. Hnahthial District ah hian SDO Sadar division 1 leh RD Block 1 awmin thingtlang khua 32  a awm a. Hnahthial District-ah Police station 2 leh outpost 1 a awm bawk a ni.