450/2023-2024

Aizawl, the 15th May 2023: Department of Mass Communication, Mizoram University chuan ni 2 chhung awh tur National Seminar on ‘National Integration through Cultural Exchange’ Conference Hall, Guests’ House, Mizoram University-ah a buatsaih a. He seminar hi khuallian Governor Dr Hari Babu Kambhampati, Chief Rector, MZU ni bawk chuan vawiin chawhma khan a hawng a ni.

MZU in ram mipuite inpumkhatna kawngah Seminar a buatsaih chu tha a tih bakah tunlai boruak kan thlir phei chuan a tul tak zet tih Governor chuan thuhmahruaiah a sawi a. Unity in Diversity kan tih fo, ram pakhata chengho, hnam ziarang leh khawsak phung inanglo tak takte in dawh tawna, tha taka aawm tlan hi India ram angah phei chuan a pawimawh hle a. Inpumkhatna tura theihtawp kan chhuah tlan hi khua leh tui zawng zawng ten kan mawhphurhna a ni tih kan hriat thar leh a ngai a ti.

Governor chuan tunhma deuh kha chuan India Hmarchhak te chu en hran deuh a ni mai awm mang e tih tur a ni a. Mahse, Prime Minister Narendra Modi in mawhphurhna a rawn chan hnuah he thil hi zawi zawiin siam that zel a ni a. Tunah phei chuan mainland India leh India hmarchhak te kan intlawhpawh nasa sawt a, kawng engkimah – ram hmasawnna, inkalpawhna leh inpumkhatna ang zawng pawhin India hmarchhak hmasawnna hmuh theihin a awm tih a sawi.

Central sawrkarin state hrang hranga cheng te te inhmelhriatna atana leh intlawhpawhna atana Ek Bharat Shreshtha Bharat programme a kalpui chuan awm zia a nei a, inpumkhatna kawngah a tangkai hle tih a hriat a ni a ti a. Inpum khata, in hre chiang tur leh inkawmngeih tur chuan a taka inchenchilh leh hmaichhan ngeia inkawm tluk a awm lo a. Hemi kawngah hian cultural exchange program te hi a theih anga zing zawka kan kalpui a tha hle dawn a ni a ti.

Full speech of Governor Dr Hari Babu Kambhampati : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-seminar-on-national-integration-through-cultural-exchange-organized-by-department-of-mass-communication-mizoram-university-students-experience-in-inter-state-living-seil-at-m

Dr Irene Lalruatkimi, Assoc Prof, Department of Mass Communication, Mizoram University hnen atanga seminar thupui sawihawnna ngaihthlak a nih hnuiin seminar hawnna program hi tan a ni a. Khualzahawm Prof Sunil Umrao, University of Allahabad hnena atangin Seminar in a tum leh a thuken pawimawh zual te ngaihthlak chhunzawm a nil eh a. Prof Pravakar Rath, Acting Vice Chancellor, MZU, Prof Lalnundanga, Registrar, MZU leh Prof Bhartendu Singh, Dean of SEMIS, MZU ten thu an sawi bawk.

Seminar neih chhung hian Session 6 – offline session 2 leh online session 4 neih a ni dawn a. Session tinah hian Seminar thupui hnuaiah zir bing tura mithiam ten an thuziah an rawn chhawp chhuah hrang hrang te zirhona neih a ni dawn a ni.