449/2023-2024

Kolasib dated 15th May 2023: Vawiin khan DRDO Conference Hall, Project Veng, Kolasibah Bharatmala Pariyojna hnuai a NHIDCL kaltlanga Kolasiba 4-lane kawng kal dan tur chungchang inhrilhhriatna hun neih a ni a. Pu John LT Sanga, Deputy Commissioner chuan hun kaihruaiin Pu K.Laldawngliana, MLA, Turial Assembly Constituency-in a telpui a. Kolasib district chhung a Public Works Department, Public Health Engineering Department, Power & Electricity Department, Divisional Forest Office hotute he hun ah hian telin Kawnpui, Khamrang leh Mualkhang khawtlang hruaitute an tel a. NHIDCL Project Management Unit, Kolasiba thawktuten 4-Lane kawng kal dan tur Powerpoint Presentation hmangin an entir a ni.

Pu John LT Sanga, Deputy Commissioner chuan nitin kan nunphungah leh eizawnna dapna kawngah hmasawnna awm tur chuan inkalpawhna tha neih a pawimawh hmasak thu sawiin 4-Lane kawng chuan Kolasib district chhungah hmasawnna nasa tak a thlen a beisei thu a sawi a. Hna te thawh tan thuai a nih theih nan leh hnathawh tan hun a leivung paih kawngah te, a tul lova ram leilung tih chereuna a thlen loh nan leh a nih dan tur ang tak a kawng tha kan neih theih nan Sawrkar ang leh khawtlang ang pawh a vilpui a pawimawh tur thu a sawi.

Bharatmala Pariyojna hnuai a 4-Lane kawng siam tur a Package 3,4,5,6 leh 7 hian Kolasib a paltlang dawn a, Vairengte leh Sairang inkar kawng thui zawng hi Km 111 niin kawng thar siam tur hi 90.25 Km a thui a ni thung. Kawng kal dan tur ruahmanna hi siam fel vek tawh niin Mualkhang a lei 500 Metre chu lei dawh zinga sei ber tur a ni a, lui luang tibuai lo tur ang berin ruahmanna siam a nih thu leh kawng sir ah thing phun dan tur ruahman tel a nih thu tarlan a ni a. Leivung dah khawlna tur engemaw zah endik a nih thu te, Motor lian tan a zawh nuam tur a zal a siam tur a nih dan te leh Sairang chhak a motor intawhkhawmna Junction ruahman dan te tarlan a ni a. Toll booth dah a nih loh tur thu leh hna hi thawh tan a nih atanga kum 2 chhung a thawh zawh tur a beisei a nih thu sawi a ni bawk.