448/2023-2024

Aizawl The 15th May 2023: Vawiin khan 23 Sector Assam Rifles leh Mizoram Outdoor Youth Club tangkawp in an buatsaih ‘Motor Bike Rally’ Flag-in Ceremony chu Gajraj Hall, Lakhimpur Battalion-ah neih a ni a, he hunah hian Law & Judicial Minister Pu T.J.Lalnuntluanga chu khuallian niin Motor Bike Rally Flag-in hi a nei a ni.

Khuallian chuan Mizoram a Bikers-tha tak tak ten ramri hnaih a awm khuate tlawh chhuak a tluang taka Aizawl an lo thleng thei chu lawmawm a tih thu a sawi a. Hnamdang te tihtur chauh a ngaih thin chu Mizo tlangvalte ngeiin an ti thei ve a ni tiin, an inpekna fakawm a ti a. Ram leh hnam hmasawnna turin theihtawp chhuah tlan a ngai a, inngaihhniamna nei lo va ‘ka ti ve thei a ni’ tih thinlung put a pawimawh hle a ti bawk. Harsatna tam tak paltlanga rally hlawhtling tak an nei chu fakawm a ti a, Mizoram tana thahnem ngai taka penchhuak zel turin bikers-te chu a sawm nghal bawk a ni. Bike rally-thiltum-ruihhlo laka fihlim, environment-humhalh, ramri khuate tan a Sawrkar laipui Scheme hrang hrang leh Sainik/Army School-a lut tur a inzirtirna te chuan rah tha chhuah in a hlawhtlin ngei a beisei tih a sawi a ni.

Minister chuan bikers ten ramri khua harsatna hrang hrang tawh an sawi te chu Mizoram sawrkar in a hria a , hma pawh a la a, mahse, Covid hripui avang khan India ram pum leh khawvel in harsatna a tawk a, duh angin an thawh chak theih loh phah a ni, a ti a. Tin, tuihna humhalh leh thing leh mau chereu zel tur ven nan Japan International Cooperation Agency (JICA) nen thawhdun tum a nih thu a tarlang a. Project pawh a hlawhtlin thuai a beisei thu a sawi . Ramri hrula awm khuate hmasawnna tura chak tak a hmalak mek zel a ni, a ti. Pu T.J.Lalnuntluanga chuan rilru put hmang thlak zel a, thing leh mau tihchereu, bawlhlawh thlahdah taka paih leh environment-tichhe lo zawnga hma sawn zel a tul thu sawiin, ‘Mizoram hi ka ram a ni’ tih rilru pu a duat leh hmangaih taka enkawl tura rilru siamthar a ngai tak zet a ni, a ti.

Mizoram sawrkarin ramri khuate a ngaipawimawh hle a, an hmasawnna turin theihtawp a chhuah mek zel thu a sawi a. Covid-19 hrileng vangin India rama state hrang hrangten harsatna an tawk tlang vek tih sawiin Central Minister-te nen meeting-neih a nih apiangin theihtawpin Mizoram hmasawnna tur a sawi thin tih a tarlang a, Pu T.J.Lalnuntluanga chuan chak zawka hmalak zel a nih tur thu a sawi bawk a ni.

23 Sector Assam Rifles leh Mizoram Outdoor Youth Club-tangkawp buatsaih ‘Motor Bike Rally’ hi May ni-4 khan Aizawl ah vailiam a ni a, ramri khua hrang hrangte tlawh a nih hnuiin, vawiin khan Aizawl an lo thleng a ni. Vawiin ‘Bike rally’ a kal te lo hmuahna inkhawm hi Riflewoman Chauhan chuan khaihruaiin, Major Aditya Chauhan chuan presentation tawi a pe bawk.

Law & Judicial Minister Pu T.J. Lalnuntluanga chuan Brigadier Girish Upadhya, Deputy Inspector General of Police, 23 Sector Assam Rifles, Aizawl, chu a office-Khatla ah tlawhin kawmna a nei nghal a. Mizoram leh Myanmar ramri venghim tura Assam Rifles te inpekna leh hnathawh fakawm a tih thu a hrilh a, a bik takin ruihhlo leh a kaihhnawih dan loa Mizoram lut tur an lo venna chu fakawm a ti hle a. Hetih lai hian, Mizoramin Industry leh leihnuai hausakna te ka la nei tha hrih lova, chuvang chuan Ramri hrula awm khuate chu eizawnna mumal tak nei lo an nih avangin sumdawnna (border trade ) kalpui kawngah hraitthiamna zau tak neih a tul thu a hrilh a ni. An sawidun zel naah Champhai District chhunga sumdawngten harsatna hrang hrang an tawh te chu a rang lama sutkian a nih theih nan a hmunah ngei tlawh dun an remti bawk a ni. Assam Rifles-te chu ‘tlang mite thian’ an nihna ang takin mipuite ti ralti zawnga khawsa lovin, an rin ngam ni turin a chah bawk a. Assam Rifles, NGO leh Kohhran-te inkarah thawhhona tha a awm zel theih nan hmalak tlan zel an tum thu an sawi bawk a ni.

Pu Girish Upadhya chuan a duh apiang tan Hindi zirna Assam Rifles-in an buatsaih thin tih Minister hi a lo hrilh a, Pu T.J. Lalnuntuanga chuan an hmalakna fakawm a tih thu hrilhin, Mizote zingah Hindi tawng hmang thei an pun zel a beisei tih sawiin  hmalam hunah uar zawka zirtirna kalpui turin a duh thu a hrilh bawk a ni.