2390/2023-2024

Aizawl, 20th October 2023: Vawiin khan Auditorium, Mizoram University-ah MZU Alumni Grand Annual Meet 2023 neih niin Governor Dr Hari Babu Kambhampati, Mizoram University-a Chief Rector ni bawk chu he hunah hian khuallian a ni a. Prof Laltluangliana Khiangte, Acting Vice Chancellor chu Khualzahawm a ni thung.

MZU Alumni te intawhkhawmnaah Governor Dr Hari Babu Kambhampati chuan MZU atanga zirchhuak tawh mithiam rual leh mi hlawhtling tak tak intelkhawm ten Mizoram University hmasawnna zelna atana theihtawp an chhuah chhunzawm chu lawmawm a tih thu a sawi a. University tha tehfung atana thil pawimawh tak pakhat chu, University atanga zirchhuakte hlawhtlinna, an hnathawh leh an thiltih te a ni a ti. MZU hian tunhnaiah hmuh theihin hma a sawn nasa a; kum zawnin NIRF ranking a India ram University thazual 100 zingah a tha pawl nihna a hauh mai ni lovin hma a sawn zel a. He hlawhtlinna kawngah pawh hian Alumni te hi hmanraw pawimawh tak pakhat an ni a. MZU Alumni te hian MZU hmasawnna atan, kawng hrang hrangah tih theih tam tak an neih bakah tuna zirlaite tan, kawng sial saktu leh kawng kawhhmuhtu an ni tel tih a sawi bawk.

MZU chhulchhuak mithiam rual punkhawmnaah Governor chuan India sorkar hnuaia social security scheme leh hamthatna scheme tam tak mipuiin kan hmelhriat loh avangin kan dawng lo tih a sawi a. Hemi kawngah hian beneficiary te hriatthiam tura heng scheme hrang hrang te hi zirtirna petu ni turin mithiam kalkhawm te hi a sawm bawk a ni.

Governor Thusawi kimchang: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-alumni-grand-annual-meet-2023-organised-by-mizoram-university-alumni-association-mizuaa-at-mizoram-university-auditorium-on-20th-october-2023

MZu Alumni intawhkhawm program hi Pu Emanuel Lalhriatzuala Ralte, President, MIZUAA-in a kaihruai a. Prof K. Robin, Convener, Alumni Advisory Committee, MZU-in lawmthu sawiin program hi tan a ni a, hemi hnu hian Pu K. Zorammuana, Vice President, MIZUAA hnen atangin Alumni Report ngaihthlak a ni.

MZU Alumni Meet-ah hian MZU-a Gold medalist-te leh Alumni achievers(Government of Mizoram leh Government of India hnuaia officer te) bakah VC, Registrar, leh Professor retired tawh te chawimawina hun hman a ni a. Dr R. Zonunsanga, Vice President, MIZUAA-in lawmthu sawiin huntawp a khar a ni.