689/2022-2023
Aizawl, the 30th May 2022: Vawiin chawhma khan Mizoram Wood Based Industries Owners Association (MWBIOA) hruaitute chuan Governor Hari Babu Kambhampati chu Raj Bhavan-ah an hmu a. An sumdawnna – thingzai, thingzai leh thing hmanga thil siamchhuah bungraw chi hrang hrang (finished products) te state pawna thawnchhuah kawnga an harsatna te an thlen a. Governor hnenah hian an harsatna te sutkian a nih theih nan hma laksak turin ngenna an thlen a ni.

Governor Hari Babu Kambhampati chuan Mizoramah Industry lian tham awm rih lo mahse, Industry tenau tam tak, sum thawkchhuak thei a tam thei ang bera din erawh a tul a. Hemi atan hian thalai mithiam zawk te entrepreneur ni turin a tam thei ang ber an rawn pen chhuah a ngai a ni a ti a. Mizoramin sum leh paia tun aia a thawhchhuah theihna turin entrepreneur tam tak a mamawh a ni a ti. MWBIOA te harsatna tawh dan te pawh chiang zawka a lo zirchian hnuah Sawrkar laipui lamah a theih anga lo nawr a tum tih a sawi bawk a ni.

MWBIOA lam atang hian an pawl president Pu C.Thanchuanga, Prop, Ceeke Woodworks chuan “TRANSPORTATION OF TIMBER INCLUDING SAWN TIMBER OUTSIDE NORTH EAST - NECESSITY FOR ROAD TRANSPORT.” Tih thupuia hmangin PowerPoint Presentation a pe a. Presentation atanga a landan chuan wood - based industry hi February 2021 atang khan awmze neia kalpui tan niin tunah hian hetiang Industry hi hmun 12 velah kalpui a ni. Heng unit 12 te hian February 2021 leh tun inkarah GST-ah sum Rs 77.00 lakh chuang an chhunglut tawh a. Tunah hian harsatna thenkhat an nei mek tih an sawi a. Rel-ah chauh lo chuan an bungraw siam te hi a siamna hmun atanga state pawna phurhchhuah phalsak an ni lo a. Rel a wagon te awlsam takin an hawh theihloh bakah anni ang bul tan tir tan chuan sum senso a sang hle niin an sawi a ni.

Heng an harsatna hi MWBIOA lam chuan Ministry of Environment, Forest and Climate Change hnenah kawngpui pangaia lirthei lian hmanga an phur phalsak a nih theih nan dil sak turin Governor hi an ngen a. Myanmar atanga Zokhawthar kaltlanga Thingzai phurhluh a nih theih na tur pawhin hma laksak turin an ngen a. MWBIOA chuan Myanmar-ah thingzai thachi tam tak a awm thu sawiin heng thizai te hi Mizoramah lakluh theih tur list-ah dah a nih chuan Mizoram tan sum tam tak a thawkchhuak dawn niin an sawi a ni.

Meeting-ah hian MWBIOA aiawhin Pu PH Rama, Secretary & Prop, Stephen Woodcraft, Pi Maggie Lalnunsangi, Treasurer & Prop, DCM Woodbased Industry leh Pu Chalrosanga,Exe.Member & prop (RTP Wood Industry) te pawh an tel a ni.