690/2022-2023
Aizawl, the 30th May 2022: Khawvel pumin hripui COVID-19 leng avanga hun harsa a tawh mek laiin ramchhungah pawh naupang tam takin an tuar tih hriain, Prime Minister Pu Narendra Modi chuan ‘PM Cares for Children Scheme’ a rawn duang a. He Scheme hi nikum ni 29th May, 2021 khan kalpui tan a ni a, naupangte tan hamthatna tam tak awmin, an lo puiltin hnuah an lo intundin theihna tur atana ruahman a ni.

‘PM Cares for Children Scheme’ in a tum ber chu 11th March, 2020 atanga 31st December, 2021 (3rd March, 2022 thleng hun pawtsei) chhunga COVID-19 avanga naupang kum 18 tling lote (i) Nu leh pate Covid-19 avanga boral ve ve te, (ii) Nu emaw, pa emaw Covid-19 vang kher lo a boral tawh, a damlai zawka te Covid-19 avanga boralin emaw, (iii) Anmahni enkawltu (legal guardian) emaw fa atana latu (adoptive parents) te Covid-19 avanga an boralin, an boralsan tak naupangte dawmkanna tura Scheme duan a ni. He Scheme hian huamzau taka naupangte enkawl leh venhim te, an hamthatna atana Health Insurance siam (PMJAY ah thun vek an ni a, hei hian cheng nuai 5 thleng a huam a ni) leh zirna kawnga tihchak te, naupangin kum 23 a tlin hunah mahni intodelh thei tura thuam chakte hi a tum ber a ni. He Scheme hian naupangte zirna leh hriselna kawngah puih leh chawikanna tur kawng a ngaihtuahsak a. PM Cares chuan a bik taka scheme duan hmangin naupangin kum 18 a tlin huna pawisa cheng nuai 10 thleng an dawn theihna tura ruahman a ni.

Vawiin khan he ‘PM Cares for Children Scheme’ hun hmanna hi Aizawl DC Dr. Lalhriatzuali Ralte leh sorkar officials engemawzatin NIC Video Conferencing Studio atangin an chhim a. Prime Minister Narendra Modi bakah Women & Child Development Minister ten video conferencing hmangin rampum huapin hun an hmang a, thu pawimawh tak tak an sawi bakah naupang engmawzat hnenah he Scheme hnuaia tanpuina an hlan nghal bawk a ni. Mizoram bikah chuan naupang 14 te hnenah PM Cares for Children Scheme hnuaiah hian tanpuina pek a ni dawn a ni.