210/2023-2024

Aizawl, the 25th April 2023: Vawiin khan Mizoram University leh Amrita University (Amrita Vishwa Vidyapeetham), Kerala tangkawpin Zirna leh Zirna atana Digital hmasawnna chungchang NGO leh Khawtlang hruaitute nena sawihona - CIVIL 20 (C20) MIZORAM CONCLAVE on ‘Education & Digital Transformation’, G-20 hnuaia hmalakna pawimawh tak chu Seminar Hall, Department of Education, MZU-ah a buatsaih a. He hun hi Governor Dr Hari Babu Kambhampati chuan khuallian niin a hmanpui a. Governor chuan he hunah hian Amrita University leh Mizoram University tangkawpin Science and Technology Innovation Hub (STI Hub) an din hmanga Tribal mite zirna, eizawnna leh khawsak phung tih hmasawn tuma hma lak an tumna program a hawng nghal bawk a ni.

MZU in an thawhpui Amrita University hi India rama University thazual NIRF Ranking 2022-ah university thaber 5-na a ni mek a. MZU leh Amrita University thawhhona hnuaiah hian Science, Technology leh Innovation(STI) hub Aizawl leh Serchhipah siam a ni dawn a ni.

Governor Dr Hari Babu Kambhampati chuan Mizoram University leh Amrita University te thawhdunna hnuaiah G20 hmalakna zinga pawimawh ber pakhat, tlawmngai pawl leh khawtlang hruaitute nena Zirna kawnga hmasawnna chungchang sawihona buatsaih a nih chu lawmawm a tih thu a sawi hmasa a. He Conclave pawimawh takah hian mithiamte leh conclave chhim tura sawm bik tlawmngai pawl leh khawtlang hruaitute chuan an thupui pawimawh tak tak pathum an sawihona atangin hmalak dan tur tha zawk an hmuhchhuah a beisei tih a sawi a ni.

Governor chuan India ramin khawvel ram hausa zual te leh ram hmasawn mek te intelkhawmnaah( G20) hruaitu chan chang mekin mawhphurhna pawimawh tak a nei tih a sawi a. India ramin G20 president a nihna anga tihhlawhtlin a tum zinga pawimawh ber pakhat chu hmasawnna tluantling, awmze nei leh nakin huna nghawng tha lo nei lo siam a ni a ti a. He hmachhawp hautak zet tihhlawhtlina atana hmanrawn pawimawh tak chu Education leh technology a ni a. Education leh technology kaltlanga hmasawnna tluantling siam tur chuan tlawmngai pawl hrang hrang te leh khawtlang hruaitute te inpekna leh sawrkar emaw a hmalatu an tawiawmna a pawimawh ber thung a ni a ti.

Governor chuan India ram chu digital technology-ah hma a sawn nasa tawh hle a. Tunah hian 5G technology kan hmang tawh a, kum 2030 a lo thlen chuan 6G hman kan tum a ni a ti. Hetianga India in nasa taka Digital technology a hma a sawn tak hnuaah hian kan ram tawhchhuah leh theihna chu Gross Domestic product(GDP) hmanga the theih a ni ta lo a; Gross Domestic Knowlegde Potential (GDKP) a ni tawh zawk a. Knowledge – “K” factor-ah phei chian khawvelah hmahruaitu kan ni mek a. Knowledge leh education anga kan theihna hi technology hmangin kan peipung mek a. Hei hi khawvel in ram hmasawn leh thang a tehna a ni mek a ni a ti.

Zirna huanga tunlai thiamna hman tangkai a pawimawh zia sawiin hei hi Mizoram pawhin kan tanlakna tur a ni tih a sawi a. Governor chuan Mizoramah eizawnna atan mi tam zawkin tlangram lo neih kan hmang a; hei hi tunlai khawvel sik leh sa inthlak danglam nasa takah hian a hlawk loh mai bakah a him lo chho telh telh a. Zirna leh Technology lama thiamna kan bawh a, thiam bik thil eng enge maw neih kan tum a angai a. Education leh technology lam huangah kan thalaiten an theihna sang tak hmang tangkaiin chhawr tlaka thiam thil an zirchhuah tam a pawimawh telh telh dawn a. Hetiang zawng hian kan eizawnna him tawh lo atangin a hlawk zawk leh him zawkah insawn kan tum tur a ni a ti.

Full Speech of Governor Dr Hari Babu Kambhampati : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-conclave-on-civil20-c20-working-group-on-education-and-digital-transformation-at-mizoram-university-on-25th-april-2023

Prof. Pravakar Rath, Vice Chancellor, Mizoram University in conclave palai te lawman thu sawiin CIVIL 20 (C20) MIZORAM CONCLAVE on ‘Education & Digital Transformation’ chu tan a ni a. Hemi hnu hian Dr Renu Sharma, Chief Secretary in conclave chungchanga sawihawnna neiin thu a sawi hmasa ber a. Chief secretary chuan Mizoramah Digital infrastructure tan Budget-ah sum dah tam kan mamawh tih a sawi a. Tunah hian India ramah ziak leh chhiar thiam tam lama tehin a sangber pahnihna kan ni mek a. Hei hian digital technology lamah pawh tan kan lak chuan state hmasawn ber pawl kan ni thei tih a tarlang tih a sawi. Chief Secretary chuan Mizoramah hmeichhia leh mipa inthliarna a awm lo chu tha a tih thu sawiin Mizo hmeichhia te zingah ziak leh chhiar thiam chu 89.7 % lai a ni chu ropui a tih thu sawiin a chhuanawm tak zet a ni a ti. Conclave pual hian Ambassador Vijay K Nambiar, Principal Coordinator, C20 thusawi thlirho leh a ni a. Hemi hnu hian Nula Hasina Kharbhih, Founder & Chairperson, Impulse NGO Network & Impulse Social Enterprises, Shillong Conclave thupui 3 chungchangah thuhmahruai a sawi a. Pu Lalhmachhuana, Vice President, CYMA leh Prof Prema Nedungadi, National Coordinator, working Group on C20 te pawhin thu an sawi leh a. Hemi hnu hian Conclave hawnna puala inkhawm hi Prof Lalnilawma, HOD, Department of Extension Education & Rural Development, MZU chuan lawmthu sawiin a khar a ni.

The CIVIL 20 (C20) MIZORAM CONCLAVE on ‘Education & Digital Transformation’ ah hian sawihona hun then 3 -ah neih a ni a – Substance Abuse Awareness, Skill Development and Digital Transformation, leh Food, Nutrition and Ayurveda te chu thupui atana hman an ni.