211/2023-2024

Aizawl the 25th April 2023: Young Indians (YI) Mizoram leh sawrkar laipuia Ministry of Youth Affairs and Sports tangkawp buatsaih ‘Y-20 Brainstorming Session’ chu vawiin khan Pachhunga University College-ah neih a ni a, Mizoram Sports & Youth Services Minister Pu Robert Romawia Royte chuan khuallian niin a hmanpui.

Khuallian chuan India in G-20 President a chelh denchhana sumdawngte hmakhua ngaia Young Indians hmalakna chu fakawm a tih thu sawiin vawiin session chu Mizo thalai te leh sumdawngte tan a hlawkthlak hle dawn a ni, a ti a. Young Indians leh a bikin Young Indians (Mizoram) chu Mizoram tan kawng engkimah theihtawp an chhuah thin avangin lawmthu a hrilh a ni.

Minister chuan entrepreneur hlawhtling ni tur chuan Information Technology hman thiam a pawimawh a ti a. Social media platform hrang hrangte chu hman thiam phawt chuan game-changer an nih theih rualin; thu dik leh diklo thliar thiam a, ram changkang zawk ten tuihalna dik a an tuihal a, hriatna dik an zawng ang hian ngaituahna hman a thliar thiam a pawimawh a ni, a ti. Pu Robert Romawia Royte chuan tunlai khawvel a harsat tawh rualin mi hmanghria leh taima te tan chuan remchanna khawvel ‘full of opportunities’ a ni, a ti a; tunhma a awm ngai lo remchanna tam takte chu hmang thiam turin kalkhawm thalai te fuihin, tunlai khawvel global village-ah hian ram changkawng zawk te chin dan tha entawn a theihtawp chhuah zel a tul a ni, a ti.

Khuallian Minister chuan status (dinhmun) pahnih a awm thu sawiin Acquired status (nu leh pa, pi pute hausakna chhawm) nei thalai tamna chu ram changkang a ni ngai lo a ti a, Achieved status (mahni a ding chhuak hlawhtlingte) nei thalai tamna chu ram changkang leh ropui a ni, a ti bawk. Mizoram ah thalai sorkar hna kher ni lo sumdawnna lama hlawhtling tamtak an awm tawh chu lawmawm a tih thu sawiin sum lakluhna erawh fimkhur a tul a ti hle a; Sum hnar thianghlim lo a hausa te chu mipui ten hnualsuat a, ngaihnep ngam a tul hle a ti bawk.

Taimakna a pawimawh thu a sawi rualin tunlai khawvelah thiam taka hnathawh a ngai tawh a ti a, ‘Khawvel a smart tawh ang bawkin mipui te pawh kan smart a ngai’ a ti. Fitness a pawimawh hle tiin chumi tan chuan ei leh in ah Mizote a bikin insum a ngai a ti a, ‘Mizo te chu India rama state fit ber kan ni thei a ni’ tiin ei leh in lama fimkhur turin leh zu leh drugs, ruihhlo do zel turin leh a dona kawngah tan lak pui theuh turin kalkhawmte a chah bawk a ni.

Zotres Hospital Pvt. Ltd. atangin Trinity Hospital Director leh CII member ni bawk Dr. Lalrintluanga Jahau pawhin CII chanchin sawina hun a hmang a. Confederation of Indian Industries hi kum 1895 a din niin, New Delhi-ah hmunpui an neih mek thu te, CII chu sawrkar behchhan lo (Non-government) leh hlawkna um lo (not-for-profit) pawl an nih thu sawiin, Industry leh Civil society te thanlen zel nan a ding an ni, a ti a. Tun dinhmunah CII-ah hian member 8000 chuang an awm mek thu a tarlang bawk.

Vawiin programme-ah hian Pu Sobin Jaishi, Chairman, YI Mizoram Chapter in lawmna thu a sawi a; Dr. H. Lalthanzara, PUC Principal pawhin thusawi tawi neiin Pi Ruby Sailopari, Yuva Vertical YI Mizoram in lawmthu sawiin chawhma hun a khar a ni.

Chawhnu programme-ah resource person hrang hrangte atangin thusawi ngaihthlak a ni a. ‘Sharing of success story, Experience in Innovation and Business Development’ tih thupui hmangin Mt. Carmel School Principal cum Proprietor Pu Lalnunkunga Sailo, Lailen Consulting Director/ CEO Pu Alan Lalhriatpuia, Innovation and Business Development CEO cum Principal Architect, LB Associates Pu Lalbiakmawia Ngente, Trinity Hospital Director Dr. Lalrintluanga Jahau, Zozia Proprietor Pi Laltanpuii leh Proprietor LV Art, Zonet Cable TV Director leh Lengzem Magazine Editor Pu Vanneihtluanga te hnen atangin thusawi ngaihthlak a ni.

Young Indians hi Confederation of Indian Industry peng pakhat ni turin kum 2002 khan din a ni a. Thalai ten ram inrelbawlna leh hmasawnna kawnga hmun pawimawh an chan theih nan leh leadership skills an neih theih nan a hmala tura pawl ding a ni.