No.4108/2021-2022
Aizawl, the 25th February 2022: Governor Hari Babu Kambhampati chuan vawiin khan Prof R.P.Vadhera, Vice Chancellor leh Dr David Lawmzuala, Registrar, ICFAI University, Mizoram te chu Raj Bhavan-ah a kawm.

Governor Hari Babu Kambhampati chuan ICFAI University Mizoram hotute chu an hnathawhnaah te harsatna an tawk em tih te, an hmasawnna te bakah kum rei vak lo kal taa ICFAI University zirlai te leh campus thuneitute inkara inhmuhthiamlohna chungchang te a zawt a. ICFAI hotuten Campus buaina chinfel a nih tawh thu leh tunah chuan tha takin zirna kalpui a nih thu te bakah campus buaina avanga zirlai kum 2 chhung vel an neih tlem hnuah zirlai pangai takin an neih belh tawh thu te an sawi a ni. Governor chuan ICFAI University Mizoramah zirlai ten boruak tha tak hnuaiah zirna an chhunzawm zel theihnan a thuneitute lam pawh tan la zel turin a fuih a ni.

Mizoram a zirna in sang zawkah te professional leh Vocational course a la awm tam loh laia ICFAI University in hetiang lama zirna tha tak a kalpui chu Mizoram tan leh Mizo thalaite tan malsawmna a ni a ti a. Skill Development lamah Mizo thalaite an zuanluh tam a, Mizoram pawna hna tha tak tak an thawh theih nan Science zirtirna tha leh softskill lamah te tan lak a la ngai nasa hle a ni a ti. Mizo thalai ten pawnlama hnathawh an huphurhna tibo turin English leh Hindi tawng thiamah tan lak a la ngai bawk nia a hriat thu a sawi a. High School tam takah science subject zirtirtu an awm loh avangin zirlai tam takin pawl 11 leh 12-ah science subject an la pha thin lo chu pawi a tih thu a sawi a. Kum tina science graduate Mizoram atanga chhuak leh state danga chhuak zat a inthlau lutuk nia a hriat thu a sawiin tan lak a la ngai hle a ni a ti.

Governor hmaah Prof R.P.Vadhera, Vice Chancellor chuan PowerPoint presentation hmangin ICFAI University, Mizoram dinhmun, thiltum leh hmachhawp te a sawifiah a. Tunah hian zirlai 556 an awm mek a; heng zinga 89 te hi Undergraduate zirlai niin 467 te chu Post Graduate zirlai an ni thung.

Tunah hian, ICFAI Mizoram chuan kum 2025 hmaa NAAC accreditation neih tumin hma a la mek a, kum 2023 hmain NIRF Ranking a tel dan a dap mek bawk a ni. Professional degree leh diploma certificate course hrang hrang - Big Data, Cloud Computing, Cyber Security, Design Thinking, Digital Marketing, Fundamentals of Programming, Data Analytics, Internet of Things Business Analytics, Machine Learning leh Deep Learning Data Science zirna hawn a tum hnai a. Paramedical Medical Sciences huanga Diploma leh certificate courses hrang hrang - Radiologist Assistant, Medical Laboratory Assistant, Operation Theatre Assistant, Nursing Care Assistant, ECG Assistant, Dental Assistant, Ophthalmic Technician, CT Scan Technician, Dialysis Assistants, ECG Assistants, MRI Technicians leh CT Scan Technicians etc., zirna te pawh hawn tum mek a ni a. Heng bakah hian, ICFAI Mizoram Mizoram chhunga a hmasa ber ni turin D.P.Ed. leh B.P.Ed. programmes te pawh hawn tum niin 2022 academic Session chhungin subject thenkhatah Ph.D. programme kalpui tum a ni.