2122/2022-2023
Chhingchhip, the 30th September 2022:
Governor Hari Babu Kambhampati chuan vawiin khan Sainik School Chhingchhip a tlawh a. He hunah hian School building leh hmunhma te a endik a, Sikul naupangte hmaah fuihna thu a sawi bawk a ni.

Governor hian Sainik School a thlenin amah zahna chibai 8 Bn Assam Rifles ten School kawtah an lo buk a. Wcdr Shahul Hameed, Principal leh Maj S.Kalyan, Administrative Officer ten zirtirtute leh School staff te an hmelhriattir chhunzawm a. Hemi zawh hian Principal Office ah Sainik School dinhmunte inhrilhhriatna hun neih leh a ni a. Assembly Hall-ah Official programme leh Cultural Programme neih chhunzawm nghal a ni.

Governor Hari Babu Kambhampati chuan Principal leh a thawhpui ten Sainik School tha tak ni tur leh hmun danga Sainik School te dinhmun pha tura theihtawp an chhuah chu fakawm a tih thu a sawi hmasa a. Mizoram sawrkarin hetiang ang School tha bik Mizorama zirlaite tan a buatsaih thei chu lawmawm a tih thu a sawi bawk a ni.

Sainik School Chhingchhip hi India ram hmundang te aia a danglam bik na chu helai hmunah hian Sainik School dangte entawn turin a vawikhatna atana leh a hmahruaitu ni turin hmeichhe naupangte luh tir an ni a. Hei hi a chhuanawm tak zet a ni a ti.

Sainik School te hi khawi hmunah pawh School thabik an ni a, Sipai, Navy leh Airforce Officer ni turin a bik takin heng schoolah te hian zirlai te zirtirna pek a ni a ti. Sainik School a zirlaite hi Armed Forces ah an thawkvek kher lo a nih pawhin khawtlang leh ram tana khua leh tui entawn tlak ni tura chher an nih thu a sawi bawk.

India chakna chu danglamna tam tak kara inpumkhatna leh inunauna tha a ni tih zirlaite chu a hrilh nawn leh a. He mawhphurhna huangah hian Sainik School zirlaite chu hmahruaitu ni turin a chah a ni.

Full speech of the Honble Governor : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-visit-to-sainik-school-chhingchhip-on-30th-september-2022

Maj S.Kalyan, Adm in Governor Hari Babu Kambhampati lawmna thu a sawi hmasa a. Hemi hnu hian Assembly Hall chhunga programme hi tan a ni a. Zirlai ten Governor pualin Cultural programme an hmang a. WCdr Shahul Hameed, Principal, Sainik School, Chhingchhip chuan lawmthu sawiin huntawp a khar a ni. Official programme zawh hian Saini School Campus chhunga School building leh hmunhma te Governor chuan a endik chhunzawm nghal a ni.

Principal Report atanga a lan dan chuan Sainik School Chhingchhip hi kum 6 hmel a hmu mek a. Tunah hian batch hmasa ber(Class VI) te chu Class XI an ni mek a ni. Sainik School a lut tur hian All India Entrance Test paltlang a ngai a. Sikul naupang pakhat tana kum khat chhunga senso chu Rs 1.85 lakh velah chhut a ni. Kumtin Class VI ah hian mipa naupang 60 leh Hmeichhe naupang 10 admission pek an ni mek a. Class IX ah erawh chuan mipa chiah admission pek niin kum tin seat 10 a awm thin a ni.

School naupangte hian zing dar 5 vel atangin zan dar 9:30 vel thleng nitin, lehkha zirna hun, infiamna leh thildang tangkai zir nan hun an hmang thin a.

Lehkha zirna leh a kaihhnaih(cocurricular activities) bakah zirlaite tan hian taksa insawizawina leh themthiamna chidangte ( extracurricular activities) atana hmunhma pawimawh Football Ground, Badminton Court, Basketball Court, Gynasium, Music room,etc., te he school hian a nei a. Swimming pool, parade ground leh sports facility tangkai tak tak buatsaih chhoh zel a tum bawk.

Principal hian Mizoram sawrkar in tanpuina a pek thin - GIA dinhmun te, Ambulance te chi MRB in CSR kaltlanga pek a tum chungchang te, NCC te tana tangkai INSAS silai Home Department, Govt of Mizoram in pek a tum chunchang te Rs 99,96,000 school tihphuisuina atana Ministry of Defence atang sum lo kal tur chungchangte a sawi a. An harsatna pahnih Tui Bill sang tak leh Electric chhit man sang lutuk chungchangte pawh sawi a ni. Kawlphetha a harsatna sutkian a nih theih nan campus chhunga Solar Power Generation Plant bun turin Governor chuan Sainik School Chhingchhip hotute chu thurawn a pe a. Tui bill chungchang pawh Serchhip DC office leh PHED ten chinfel sak turin hma an la mek tih sawi a ni.

Governor in Sainik School, Chhingchhip a tlawhnaah hian Pu Lalmuansanga Ralte, Addl DC leh Pu Stephen Lalrinawma, SP, Serchhip District pawh an tel a ni.

Attachment

  • Loading attachment...