3912/2022-2023

Aizawl, the 21st March 2023: Governor Hari Babu Kambhampati chuan vawiin khan Zoram Medical College(ZMC), Falkawn a tlawh.

ZMC hi Mizoram University leh NMC(MCI ni thin) ah affiliated college ni mekin Mizoram chhunga medical college awmchhun a ni a. Tunah hian National Medical Commission (NMC) pawmpuina nei turin theihtawp chhuah mek a ni.

ZMC-ah hian Pi Esther Lal Ruatkimi, Principal Secretary, H&FW, Dr. John Zohmingthanga, Director, ZMC, Dr. Jane R Ralte, Registrar leh ZMC hotu thenkhatin Governor Hari Babu Kambhampati hi an lo hmuak a. ZMC a thlen veleh, Governor chuan ZMC attached Hospital tlawh hmasain Ward thenkhat leh Operation Theatre te a endik hmasa a ni. Hemi hnu hian ZMC hotute chuan Governor chu Academic Block tlawh turin an sawm a. Academic Block-ah hian department hrang hrang ten Museum an neih te, class room te leh hmun pawimawh dang te a tlawh a ni. MBBS 3yr zirlaite nena inhmelhriatna leh inkawmna hun a nei bawk.

ZMC hmunhma te a tlawh kual hnu hian Governor Hari Babu Kambhampati chuan ZMC hotute chu Council Room, ZMC ah a kawm chhunzawm a. He hunah hian ZMC chungchang, hmalakna kal mek leh hmachhawp te PowerPoint hmangin Dr John Zohmingthanga, Director chuan a sawifiah hmasa a. ZMC in hmachhawp pawimawh tak tak a neih zinga NMC atanga recognition hmu tura pawimawh zual te Pi Esther Lal Ruatkimi, Principal Secretary in Governor chu a sawipui a. Mizoram Sawrkar anga Health Minister hova proposal thehluh tawh leh bawhzui ngai te pawh Governor chuan a remchan dan a hmalakpui turin a ngen nghal bawk a ni.

Governor Hari Babu Kambhampati chuan Mizoram tana ZMC pawimawhna te a hriatthiam thu a sawi a. Mizoram sawrkarin NMC pawmpuina hmu tura ZMC theih tawpa a ti phuisui chho zel chu lawmawm a tih thu a sawi a ni.

Governor chuan Aizawl pawnlamah hmun tam takah a zin chhuah tawh thu a sawi a. Heng a zinchhuahnaah te hian Doctor indaihlohna chu a takin a hmu tih a sawi a. Zoram hmun hrang hrangah Doctor indaihlohna a nasa a, a bikin Hmeichhe lam Doctor(Gynaecologist) leh Naupang enkawltu Doctor (Pediatrician) indaihlohna a zualkai bik a. Thingtlang lama Doctor indaihlohna te hi ZMC atanga MBBS zir zo an rawn awm hunah a ziaawm a beiseiawm a, a nghahhlelhawm tawh hle a ni a ti.

ZMC in NMC pawmpuina nei tura hmasawnna ruhrel siam kawnga project proposal a siam te chu a theih anga lo nawrpui a tum tih a sawi a. Heng hmasawnna ruhrel te hi a siamna atana sum a hautak deuh avangin PSU lian deuh te be kual a, CSR sum te ngaihven tha a tih thu a sawi bawk. A ngaih pawimawh em em pakhat chu ZMC department hrang hrang te chu hmanraw changkang zawk nena thuam that a ni a ti. Hemi chungchangah hian Governor chuan Principal Secretary leh ZMC Director te chuan ZMC Department tina HOD te nena inrawnkhawmna nei a, an hmanraw mamawh se chiang taka chhawp chhuaka, proposal tha tak siam turin thurawn a pe a. Ministry lamah thehluh a nih hun theihtawp chhuahin nawrpui a inhuam thu a sawi a ni.

Governor chuan ZMC a MBBS zirlaite tana thil tangkai tak tur chu Civil Hospital Aizawl a practical experience neih a ni a ti a. Hei hi a taka kalpui a nih theih nan ZMC chuan Civil Hospital Aizawl nena thawhhona kawng an dap tha a tih thu a sawi bawk.

ZMC ah hian kumtin MBBS zirna atan seat 100 quota felfai taka siam sa behchhanin a awm a. 70% state quota, 15%All India Quota(NEET), leh 15% NRI Quota te atangin zirlai te admission pek a ni thin a ni. Tunah hian MBBS zirlai 488 awm mekin heng zinga 270 chu hmeichhia niin mipa 218 an ni thung. MBBS batch hmasa ber te chuan intern leh house an zawh hnuah Kum 2024 hian degree neiin an rawn zir zo dawn a ni. ZMC ah hian zirtirna lama inhnamhnawih 144 leh non-teaching staff 554 awm mekin an vawiin thawktu 698 an awm mek a, thawktu te luah mek, residential quarter 225 a awm bawk.

ZMC attached Hospital ah hian ICU khum 38, damlo khum dang 470, Major Operation Theatre (OT) 7(+3), Minor OT 2(+4) leh Casualty khum 20 awmna a awm mek a. Bus service tha tak awm tawhin Aizawl leh ZMC chhehvel atang pawhin ZMC hi pan a awlsam tawh hle a ni. ZMC hian Oxygen 1500 LPM - PSA lai a tam siam theih na Oxygen plant 3 hmangin a nei mek a. Natna leh inenkawl dam dam kawnga zirbingna - reasearch unit pawh 3 -Model Rural Health Research Unit, Viral Residential Diagnosis Lab leh Multi Disciplinary Research Unit a kalpui mek bawk a ni.