3569/2022-2023
Aizawl, the 13th February 2023: Governor Hari Babu Kambhampati chuan vawiin chawhma khan Financial Literacy Week 2023 chu Auditorium, Mizoram Rural Bank, MINECO ah a hawng a. FLC 2023 chung hian thupui atan “Good Financial Behaviour – Your Saviour” tih hman a ni a. He thupui hnuaiah hian sum khawl, uluk taka pawisa hmanna tur duan lawk, pawisa lut leh chhuak tur hisap lawk tangkaina bakah digital banking Service hrang hrang te tangkai zawk a hman leh fimkhur dan inzirtirna te neih tum a ni.

Governor Hari Babu Kambhampati chuan India sawrkarin tihpuitlin a duh em em chu mitin ban phaka sum vawn dan tha zawk – banking services leh digital banking services te chhawp a ni tih a sawi a. Kum 2013 khan National Strategy for Financial Education chu tlangzarh a ni a. Hemi kum atang hian hmasawnna kawng tam takah hmuh theihin a awm a. Kum 2014 a Pradhan Mantri Jan Dhan Yojana(PMJDY) kalpui a nih atang khan mitin deuh thaw leh chhungtin deuh thaw in bank account te neiin Banking services an mamawh tawh a. Tunah hian mitin, chhungtin banphakah banking services a awm tak avangin sum vawn dan tha zawk leh customer te venhimna(Financial Education and Customer Protection) kawngah chak zawka hmalak a ngai tawh a ni a ti. He FLC 2023-ah hian , PMJJBY, PMSBY, APY, PM-KMY, PM-SYM, leh PMMY chungchang te uar taka mipui zirtir turin banker te a chah a. Media lam te pawh RBI in Bank account neitute himna tura thurawn a tichhuah te vawrh darh kawngah leh mipui zirtirna kawngah theihtawp chhuah turin a ngen bawk.

Governor chuan Mizoram chu Ziak leh chhiar tamna ber state pakhat a ni a, bank services lama hawiharh kawngah erawh a hnufual pawl kan ni mek thung a. Hei hi kan tan lakna tur lai a ni a, scheme tha tak tak atanga tanpuina kan hmuh tur te, kan hriat loh avanga kan dawn loh hi tam tak a awm mek a ni a ti a. Sum hman dan tha zawk hriat hi khua leh tui te chanvo a ni a, vawiina sum khawhral avangin hun reiloteah retheihna a thlen theih avangin sum enkawl dan dik hriat hi mitin mamawh a ni a ti. Insurance scheme tha tak tak leh sum peipun dan tha zawk te hi tam tak a awm a, tunah chuan mi tam ber in kan hriat chu Saving Account a ni mai a. Bankers leh sawrkar official te tan lak a ngai a; Literacy rate a kan san theih chuan kan Financial Literacy Rate pawh a rawn sang ve tur a ni a ti.

Full Speech of Governor: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-inaugural-function-of-financial-literacy-week-2023-by-reserve-bank-of-iindia-aizawl-office-at-auditorium-mizoram-rural-bank-mineco-aizawl-on-13th-february-2023

He hunah hian Governor Hari Babu Kambhampati chuan RBI in a buatsaih, Booklet - Be(A)ware chu a tlangzarh bawk a. He lehkhabuah hian pawisa leh sum chungchanga inbumna hrang hrang atanga kan lo him zawkna tur te ziah a ni.

Pu Shimrah, General Manager & Officer-in-Charge, RBI Office, Aizawl, Pu KVSSLV Prasada Rao, Officer-in-Charge, NABARD, Mizoram RO, Pu V. Jayachandra, Chairman, Mizoram Rural Bank leh Pi T Lalmuanpuii, Chairperson, Mizoram Co-operative Apex Bank te pawhin he hunah hian thu an sawi a ni.