Vawiin khan Mizoram Larsap Lt Gen (Rtd) MM Lakhera, PVSM, AVSM, VSM chuan ramri hung (border fencing) chungchanga District thuneitu pawimawh hrang hrang, ramri hung hna thawk mek Company aiawhte leh ramri hung ina a kaihhnawih khawtlang hruaitute ko khawmin hna kalpui dan a sawipui a. Mizoram sorkar Chief Secretary, Land & Revenue Department, Environment & Forest leh Home Department mi pawimawh an tel bawk.

 

 

Vawiina Durbar Hall-a meeting-ah hian ramri hung hna kal mek chipchiar takin an sawihova, he hnain a kaihhnawih harsatna hrang hrang a neihte, compensation pek tawh leh pek hmabak dinhmun pawh uluk taka thlirho a ni. Governor chuan he hna kum 2005 atanga thawh tan tawh chu a hma thei ang bera zawhfel tul a tih thu te, department hrang hrang leh a thawktu company te chu inpawh leh zual leh inngaichang tawn reng chunga hna kalpui turin a hrilh a. April thla ral hma ngeiin a hmun ngeia kala thil awmdan enho turin a hrilh. Larsap chuan ramri hung avanga khaw sawn leh pem ngaite chu an awmna hmun tur fel taka duan sak a pawimawh thu sawiin District thuneitute pawh helam hi lo enzui turin a chah.

International Rules-in a phut angin ramri hung reng reng chu ramri zai zaiah a remchan loh thin avangin, ramri hung (border fencing) chu ramri atanga yard 500 tal-ah zam tur a ni a. Hei hi ram hloh a ngaih tur a ni lova, chuvangin ramri hrula cheng mipuite pawhin he International Rules hi hrechiang se, ramri pinna pal pawnte pawh anmahni ta angin an cheibawl zui thei reng a ni tih he meeting-ah hian sawilan a ni.