4197/2024-2025

Aizawl, the 11th February, 2025: Vawiin khan Mizoram Governor Gen (Dr) Vijay Kumar Singh, PVSM, AVSM, YSM (Retd) chuan Department pali; Rural Development, Agriculture, Animal Husbandry & Veterinary leh Fisheries Department hotute chu Raj Bhavan-ah a hran theuha kawmin Sawrkar laipui scheme pawimawh tak tak hnuaia an hmalaknate leh harsatna tawhte a sawipui a ni.

Governor Gen (Dr) Vijay Kumar Singh PVSM AVSM YSM (Retd) chuan hmasawnna kawnga pawimawh tak, Sawrkar laipui scheme hrang hrang hnuaia Mizorama hmalaknate hriat chian mai bakah, harsatna tawhte Sawrkar laipuia bawhzui thuai a nih theih nana meeting koh a nih thu a sawi a. Mipuite'n an tana ruahman hamthatna hrang hrangte an hriat chiana an chhawr tangkai theih nan scheme chungchang a pawimawh hrilhhriat leh chhawmdawl kawnga theihtawp chhuah zel turin department hotute a chah a ni.

Governor chuan scheme tangkawp theite pawtkhawma hmasawnna ruhrel tha leh rotling siam ngaihpawimawh a tul thu sawiin, Mizorama Self Help Group-te thil siam chhuah, sawngbawl dan leh zawrh tura chhawpchhuah a nih dan chu fakawm a tih thu a sawi a. Hmasawnna rahbi thar, loneitute tana tha zawk leh thlanawm tak ngaihtuah zel tura chahin, organic thlai thar chhuah kawngah tan la turin a fuih a. Ran hriselna ngaihpawimawh a tul thu leh sangha thar chhuah kawnga hmalak a tul thu a sawi a. Department hotute chu langtlang leh rintlak zawka hmalak a nih theih nan digitization ngaipawimawh tel turin a chah bawk.

He hunah hian Department-te'n PowerPoint Presentation kaltlangin an hmalaknate an sawifiah a. Sawrkar laipuia bawhzui ngai harsatna an tawhte an thlen nghal bawk a ni. 

Vawiin Governor-in Department hrang hrangte a kawmna hunah hian Pu R. Zarzosanga, Commissioner & Secretary, Rural Development; Pi H.M. Hualsangi, Secretary, Fisheries Department; Pi Ramdinliani, Special Secretary, Agriculture Department; Pu Lalnunhlua, Addl. Secretary, Rural Development; Dr. Andrew H. Vanlaldika, Addl. Secretary, A.H& Vety. te bakah Secretariat leh Directorate-a department hotu dangte an tel a ni.