4196/2024-2025

Dated Kolasib the 11th February, 2025: Vawiin khan Kolasib DC Conference Hall-ah Road Safety month hman dan tur chungchang sawiho a ni a. He hun hi Pu Robert C Lalhmangaiha, Kolasib DC chuan kaihruaiin road safety month hawnna neih dan tur leh Road safety month chhunga hmalak dan tur hrang hrangte sawiho a ni.

Thutkhawmna kaihruaitu Kolasib DC chuan lirthei him taka khalh a nih theih nana hmalakna ah mipuite hnena a tam thei ang bera puanzar chu a pawimawh hle a ni, a ti a. Vawiina kalkhawmte chu he Road safety month hi hlawhtling taka a kal theih nan theihtawp chhuah turin a ngen a ni. DC chuan Traffic lama thawkte leh Police lam te an thawhrimna fakin an tha te thlah lova tan la zawm zel turin a chah bawk a ni.

Vawiina road safety month hmanna tur puala thutkhawmnaah hian hmalakna tur hrang hrang rel a ni a. Road safety month khuhhawnna chu February ni 14 zing dar 8 ah Diakkawn, Kolasib ah neih tura ruahman a ni a, he hunah hian khuallian atan leh road safety week hawngtu atan Kolasib SP, Pu David H Lalthangliana chu ruat a ni a. Hemi hmanna turah hian Kolasiba Auto leh taxi drivers association te leh driver union hrang hrangte leh NCC te leh mipui a tam thei ang bera tel tura sawm nise tia rel a ni.

Mipui hnena atam thei ang bera awareness thehdarh pawh remtih tlan niin, Road safety month pual hian Kolasib District chhungah lirthei khauh lehzual a check nise tih rel a ni bawk.  Kolasib SP Pu David H Lalthangliana chuan he road safety month hi hlawhtling taka hman a nih theih nan mipuite, traffic leh police te thawhpui turin a sawm nghal bawk a ni.

Kolasiba Road safety month hmanna tur pual a thutkhawmna ahhian Kolasib DC, SP, Sr CMO, Medical Superintendent, DIPRO, MVI Kolasib, Police Station leh Traffic Cell aiawhte leh Sub Hqs YMA leh MJA aiawhte an tel a ni.